కాలుష్య జలాలను మంజీరా నదిలోకి విడుదల

చౌటకూర్ : సంగారెడ్డి జిల్లా శివంపేట గ్రామ శివారులో ఉన్న బీరు పరిశ్రమ నుంచి కాలుష్య జలాలను మంజీరా నదిలోకి విడుదల చేస్తున్నారని స్థానికులు, యువకులు తీవ్ర ఆరోపణలు చేస్తున్నారు. వర్షాలు కురిసే సమయంలో వర్షపు నీటి ప్రవాహాన్ని ఆసరాగా చేసుకుని పైపుల ద్వారా పరిశ్రమ వ్యర్థ జలాలను నదిలోకి పంపుతున్నారని వారు పేర్కొంటున్నారు. స్థానికుల కథనం ప్రకారం, పరిశ్రమలో ఏర్పడే వ్యర్థ జలాలను విద్యుత్ మోటార్లు, పైపుల సాయంతో చెట్లు, పొదల మధ్యుగా మంజీరా నదిలోకి తరలిస్తున్నారని ఆరోపిస్తున్నారు. ఇటీవల కురిసిన వర్షాల సమయంలో ఈ వ్యవహారం వెలుగులోకి వచ్చిందని గ్రామ యువకులు చెబుతున్నారు.అయితే పరిశ్రమ ఉత్పత్తులకు అవసరమైన నీటిని మాత్రం మంజీరా నది ఎగువ ప్రాంతం నుంచి ప్రత్యేక పైప్‌లైన్ ద్వారా తీసుకుంటున్న యాజమాన్యం, వినియోగించిన తర్వాత శుద్ధి చేయాల్సిన నీటిని నదిలోకి వదులుతోందని స్థానికులు ఆరోపిస్తున్నారు. దీంతో మంజీరా నది నీటి నాణ్యత దెబ్బతింటోందని, సాగునీటిగా, తాగునీటిగా వినియోగించేందుకు అనువుగా లేకుండా పోతోందని రైతులు ఆందోళన వ్యక్తం చేస్తున్నారు.
పర్యావరణానికి ముప్పు 
పర్యావరణ నిపుణుల అభిప్రాయం ప్రకారం, శుద్ధి చేయని పరిశ్రమ వ్యర్థ జలాలు నదిలో కలిస్తే నీటి నాణ్యత దెబ్బతినడంతో పాటు జలచరాలు, పశువులు, నదిపై ఆధారపడిన ప్రజల ఆరోగ్యంపై ప్రతికూల ప్రభావం పడే అవకాశం ఉంది. నీటి రంగు, వాసన, రుచి మారిపోవడంతో పాటు జీవవైవిధ్యానికి కూడా ముప్పు ఏర్పడుతుందని వారు హెచ్చరిస్తున్నారు.
కాలుష్య నియంత్రణ మండలిపై విమర్శలు 
పరిశ్రమ నుంచి వ్యర్థ జలాలు విడుదల చేస్తున్న విషయంపై పలుమార్లు కాలుష్య నియంత్రణ మండలి అధికారులకు ఫిర్యాదు చేసినప్పటికీ స్పందన లేదని స్థానికులు ఆరోపిస్తున్నారు. వెంటనే పరిశ్రమలో తనిఖీలు నిర్వహించి, నీటి నమూనాలు సేకరించి పరీక్షలు చేయాలని, నివేదికను ప్రజలకు వెల్లడించాలని వారు డిమాండ్ చేస్తున్నారు.
దుర్వాసనతో ఇబ్బందులు
పరిశ్రమ ఆవరణలో వ్యర్థ పదార్థాలను ఎక్కడపడితే అక్కడ నిల్వ చేయడం వల్ల తీవ్ర దుర్వాసన వెదజల్లుతోందని స్థానికులు చెబుతున్నారు. సంగారెడ్డి–నాందేడ్ జాతీయ రహదారిపై ప్రయాణించే వారికి కూడా ఈ దుర్వాసన తీవ్ర అసౌకర్యం కలిగిస్తోందని పేర్కొంటున్నారు.
స్థానికుడి ఆరోపణ 
శివంపేటకు చెందిన అలీం మాట్లాడుతూ, గతంలో కూడా పరిశ్రమ కాలుష్య జలాలు విడుదల చేయడంతో మంజీరా నదిలో చేపలు మృతి చెందిన ఘటనలు చోటుచేసుకున్నాయని ఆరోపించారు. పరిశ్రమ నుంచి వెలువడుతున్న వాయు, నీటి కాలుష్యంపై ఉన్నతాధికారులకు మరోసారి ఫిర్యాదు చేస్తామని తెలిపారు.