ఫత్లాపూర్‌లో పౌర హక్కుల దినోత్సవం

బిచ్కుంద  :  ఫత్లాపూర్ గ్రామంలో గురువారం పౌర హక్కుల దినోత్సవాన్ని పురస్కరించుకుని ప్రత్యేక అవగాహన కార్యక్రమం నిర్వహించారు. ఈ కార్యక్రమానికి బిచ్కుంద మండల తహసీల్దార్  వేణుగోపాల్ ముఖ్య అతిథిగా హాజరై గ్రామ ప్రజలకు పౌర హక్కులు, రాజ్యాంగం కల్పించిన రక్షణలు, ఎస్సీ, ఎస్టీ వర్గాల హక్కులు, వాటి పరిరక్షణకు అమలులో ఉన్న చట్టాల గురించి వివరంగా అవగాహన కల్పించారు.ఈ సందర్భంగా తహసీల్దార్ వేణుగోపాల్ మాట్లాడుతూ ఎస్సీ, ఎస్టీ వర్గాల ప్రజలకు భారత రాజ్యాంగం కల్పించిన హక్కులను ప్రతి ఒక్కరూ తెలుసుకోవాలని సూచించారు. కుల వివక్ష, అంటరానితనం, సామాజిక అసమానతలకు తావులేకుండా ప్రతి ఒక్కరూ సమానత్వ భావనతో మెలగాలని తెలిపారు. సమాజంలో ప్రతి పౌరుడికి సమాన హక్కులు, గౌరవం ఉండాలని, కులం ఆధారంగా ఎవరిపైనా వివక్ష చూపడం చట్టరీత్యా నేరమని వివరించారు.

ఎస్సీ, ఎస్టీలపై జరిగే అన్యాయాలు, దాడులు, వివక్ష వంటి ఘటనల విషయంలో చట్టపరమైన రక్షణలు అందుబాటులో ఉన్నాయని, బాధితులు భయపడకుండా సంబంధిత అధికారులను సంప్రదించి న్యాయం పొందాలని సూచించారు. ముఖ్యంగా ఎస్సీ, ఎస్టీ అట్రాసిటీ నిరోధక చట్టం గురించి ప్రతి ఒక్కరూ అవగాహన కలిగి ఉండాలని తెలిపారు. గ్రామస్థాయిలో పౌర హక్కుల పరిరక్షణకు ప్రజలందరూ సహకరించాలని కోరారు.ఈ కార్యక్రమంలో గ్రామ ఉపసర్పంచ్ జంగం రాజ్ కుమార్, వార్డు సభ్యుడు గంగాధర్, బిచ్కుంద మండల రెవెన్యూ ఇన్‌స్పెక్టర్ హన్మాండ్లు, గ్రామ కార్యదర్శి పద్మ, విలేజ్ అడాప్ట్ పోలీస్ అధికారి పవన్, జీపీఓ కాశిరాం, గ్రామ పెద్దలు బాబా సేట్, యువకులు కలపవర్ రాజు పటేల్, లక్ష్మణ్ చారి, సాయికిరణ్, ఆనంద్, కిరణ్ నిరుడి, హనుమాన్లు, లింగూరం తదితరులు పాల్గొన్నారు.

పౌర హక్కులపై అవగాహన పెంపొందించుకోవడం ద్వారా సమానత్వం, సామాజిక న్యాయం కలిగిన సమాజ నిర్మాణం సాధ్యమవుతుందని ఈ కార్యక్రమం ద్వారా తెలియజేశారు.