కరువు పరిస్థితులపై కలెక్టర్ సమీక్ష: ముందస్తు చర్యలు చేపట్టాలని ఆదేశం

నాగర్ కర్నూల్ : నాగర్ కర్నూల్ జిల్లాలో నెలకొన్న కరువు పరిస్థితులపై జిల్లా కలెక్టర్ హేమంత్ కేశవ్ పాటిల్ శుక్రవారం కలెక్టరేట్ లో సమీక్ష నిర్వహించారు. ఈ సందర్భంగా కలెక్టర్ మాట్లాడుతూ... రాష్ట్ర ప్రభుత్వం నాగర్ కర్నూల్ జిల్లాలో 13 మండలాలను కరువు ప్రాంతాలుగా గుర్తించిందని తెలిపారు. కరువు పరిస్థితులపై శాఖల వారీగా సమగ్ర నివేదికలు సిద్ధం చేయాలని అధికారులను ఆదేశించారు. గ్రామాల్లో తాగునీటి సమస్య తలెత్తకుండా ముందస్తు చర్యలు చేపట్టాలని, ప్రతి 15 రోజులకు ఒకసారి తాగునీటి సరఫరాపై పర్యవేక్షణ చేయాలని సూచించారు. బోర్లు, చేతిపంపులు, ఓవర్ హెడ్ ట్యాంకులు, పైపులైన్ల పరిస్థితిని పరిశీలించాలని, నీటి సమస్య తీవ్రంగా ఉన్న గ్రామాలను ముందుగానే గుర్తించి ప్రత్యామ్నాయ ఏర్పాట్లు చేయాలని ఆదేశించారు. వ్యవసాయ, ఉద్యాన శాఖలు పంటల నష్టంపై సమగ్ర అంచనా వేయాలని, సాగునీటి లభ్యత, భూగర్భ జలమట్టాలపై నిరంతర పరిశీలన చేయాలని, రైతులకు అవసరమైన సూచనలు అందించాలని తెలిపారు. అన్ని శాఖలు సమన్వయంతో పనిచేసి నిర్ణీత సమయంలో నివేదికలు సమర్పించాలని కలెక్టర్ ఆదేశించారు. ఈ సమావేశంలో అదనపు కలెక్టర్లు, సంబంధిత శాఖల జిల్లా అధికారులు పాల్గొన్నారు.

About The Author

Vision Andhra Telugu Daily

నిజాయితీ, నిష్పాక్షికత, విశ్వసనీయత అనే మూడు విలువలను ఆధారంగా చేసుకుని పనిచేస్తున్న వార్తా సంస్థ. సమాజంలో జరుగుతున్న ప్రతి ముఖ్యమైన పరిణామాన్ని వేగంగా, ఖచ్చితంగా, బాధ్యతాయుతంగా పాఠకులకు అందించడం మా ప్రధాన లక్ష్యం.