భూ రీ సర్వే ప్రక్రియను పారదర్శకంగా నిర్వహించాలి

పెద్దకొత్తపల్లి (నాగర్ కర్నూల్) భూ రీ సర్వే ప్రక్రియను పారదర్శకంగా, సజావుగా నిర్వహించాలని జిల్లా కలెక్టర్ హేమంత్ కేశవ్ పాటీల్ అధికారులను ఆదేశించారు. పెద్దకొత్తపల్లి మండలం సాతాపూర్ గ్రామ పరిధిలోని పోచాపూర్ శివారులో శుక్రవారం జరుగుతున్న భూ రీ సర్వే పనులను కలెక్టర్ క్షేత్రస్థాయిలో పరిశీలించారు. సాతాపూర్ గ్రామ పరిధిలో మొత్తం 544 ఎకరాల భూమి విస్తీర్ణం ఉండగా, ఇప్పటివరకు 120 ఎకరాల భూమికి రీ సర్వే పూర్తి చేసినట్లు అధికారులు కలెక్టర్ కు వివరించారు. మిగిలిన భూములకు ప్రణాళికాబద్ధంగా రీ సర్వే చేపట్టాలని సూచించారు. భూముల హద్దులు, విస్తీర్ణం, యాజమాన్య వివరాలను క్షేత్రస్థాయిలో క్షుణ్ణంగా పరిశీలించాలని, వారసత్వ బదిలీ (విరాసత్) విషయంలో ముందస్తు జాగ్రత్తలు తీసుకోవాలని తెలిపారు. భూ రికార్డులను క్షుణ్ణంగా పరిశీలించి భవిష్యత్తులో వివాదాలు తలెత్తకుండా చర్యలు తీసుకోవాలన్నారు. రైతులు, భూ యజమానులకు ఎలాంటి ఇబ్బందులు కలగకుండా, పారదర్శకత పాటిస్తూ నిర్ణీత గడువులో, ఎలాంటి అవకతవకలకు తావులేకుండా నిబంధనల ప్రకారం సర్వే చేపట్టాలని ఆదేశించారు. ఈ కార్యక్రమంలో ఏడి సర్వేయర్ గిరిధర్, కొల్లాపూర్ ఆర్డీఓ బన్సీలాల్, తహసీల్దార్ శ్రీనివాసులు, ఉప సర్పంచ్ బాలీశ్వరమ్మ, వార్డు సభ్యులు తదితరులు పాల్గొన్నారు.