ప్రకృతి వ్యవసాయంతో నేల ఆరోగ్యం పరిరక్షణ

హుస్నాబాద్‌ : ప్రకృతి వ్యవసాయ పద్ధతులను అవలంబించడం ద్వారా సాగు ఖర్చులు తగ్గించుకోవడంతోపాటు నేల ఆరోగ్యాన్ని కాపాడుకోవచ్చని సిద్దిపేట జిల్లా హుస్నాబాద్ మండలం వ్యవసాయ శాఖ అధికారి వేల్పుల పూజ సూచించారు.ఈ సందర్బంగా బుధవారం రోజున సర్పంచ్ రిక్కల లత రాజిరెడ్డి ఆధ్వర్యంలో బంజేరుపల్లి గ్రామంలో రైతులకు ప్రకృతి వ్యవసాయంపై అవగాహన కల్పించారు. జీవామృతం, ఘన జీవామృతం, బీజామృతం, వేప ఆధారిత కషాయాల వినియోగం, పశువుల ఎరువు, పంట అవశేషాలు, పచ్చిరొట్ట ఎరువులు, అంతర పంటలు, పంట మార్పిడి వంటి పద్ధతుల ద్వారా నేలలో సేంద్రియ పదార్థాన్ని పెంచుకోవచ్చని వివరించారు. రసాయన ఎరువులు, పురుగుమందులపై ఆధారపడటాన్ని తగ్గించి స్థానికంగా లభించే సహజ వనరులను వినియోగించుకోవాలని సూచించారు. ప్రకృతి వ్యవసాయంతో నేలలో సూక్ష్మజీవుల చైతన్యం, తేమ నిలుపుకొనే సామర్థ్యం పెరుగుతాయని తెలిపారు. రైతులు తొలుత తమ పొలాల్లో కొంత విస్తీర్ణంలో ఈ పద్ధతులను అమలు చేసి, అనుభవం ఆధారంగా విస్తరించాలని కోరారు. కార్యక్రమంలో వ్యవసాయ విస్తరణ అధికారి విజయ్‌, ఎన్‌ఎంఎన్‌ఎఫ్‌ ఫీల్డ్‌ అసిస్టెంట్‌ ప్రశాంత్‌, గ్రామ సర్పంచ్‌, రైతులు రిక్కల రాజిరెడ్డి, బాణాల శంకర్‌రెడ్డి, నందరెడ్డి, ఇప్ప నారాయణ తదితరులు పాల్గొన్నారు.