బస్వాపూర్‌లో ఉచిత పశువైద్య శిబిరం.. పాడి రైతులకు వైద్య సేవలు

చౌటకూర్ :  సంగారెడ్డి జిల్లా పుల్కల్ మండల పరిధిలోని బస్వాపూర్ గ్రామంలో శుక్రవారం ఉచిత పశువైద్య శిబిరాన్ని నిర్వహించారు. పశుగణాభివృద్ధి సంస్థ, పశుసంవర్ధక శాఖ ఆధ్వర్యంలో ఏర్పాటు చేసిన ఈ శిబిరంలో గ్రామంలోని పాడి రైతులకు పశువైద్య సేవలు అందించారు.ఈ సందర్భంగా పశువైద్యురాలు డాక్టర్ సంధ్యారాణి మాట్లాడుతూ.. రానున్న రోజుల్లో పశుగ్రాసం కొరత ఏర్పడే అవకాశం ఉన్నందున రైతులు ఇప్పటి నుంచే ముందస్తు జాగ్రత్తలు తీసుకోవాలని సూచించారు. ముఖ్యంగా బోరు బావుల వద్ద అందుబాటులో ఉన్న స్థలాల్లో పశుగ్రాసాన్ని సాగు చేసుకోవాలని తెలిపారు. జాబ్ కార్డు కలిగిన రైతులు ఉపాధి హామీ పథకం (వీబీజీ రామ్‌జీ) ద్వారా పశుగ్రాసం సాగుకు అవసరమైన పనుల కోసం దరఖాస్తు చేసుకోవాలని సూచించారు.శిబిరంలో భాగంగా పశువులకు గర్భకోశ సంబంధిత చికిత్సలు, చూడు పరీక్షలు నిర్వహించారు. ఎదకు వచ్చిన పశువులకు కృత్రిమ గర్భధారణ సేవలు అందించారు. అదేవిధంగా దూడలకు నట్టల నివారణ మందులు తాగించారు. పశువుల ఆరోగ్య పరిరక్షణ, పాల ఉత్పత్తి పెంపు, పాడి రైతులకు అవగాహన కల్పించడమే లక్ష్యంగా ఈ శిబిరాన్ని నిర్వహించినట్లు తెలిపారు.ఈ కార్యక్రమంలో గ్రామ ఉపసర్పంచ్ బర్మల రాజు, గోపాలమిత్ర సూపర్‌వైజర్ చెన్నగళ్ల అర్జున్, సిబ్బంది డి. మాణిక్యం, ఈ. ప్రవీణ్ కుమార్ (వీఏ), జి. కార్తీక్ (ఓఎస్)తో పాటు పలువురు పాడి రైతులు పాల్గొన్నారు