విద్యార్థులు చెడు వ్యసనాలకు దూరంగా ఉండాలి -- పోలీసుల విధులు, చట్టాలపై అవగాహన -- సీఐ శ్రీనివాస్

స్టేషన్ ఘన్‌పూర్ : విద్యార్థులు చెడు వ్యసనాలకు దూరంగా ఉంటూ సైబర్ నేరాల పట్ల అప్రమత్తంగా ఉండాలని స్టేషన్ ఘన్‌పూర్ సీఐ శ్రీనివాస్ అన్నారు. శుక్రవారం ఘన్‌పూర్ పోలీస్ స్టేషన్‌లో విద్యార్థులకు పోలీసుల విధులు, బాధ్యతలతో పాటు చట్టాలు, నిబంధనలపై అవగాహన కల్పించేందుకు ఓపెన్ హౌస్ కార్యక్రమాన్ని నిర్వహించారు. ఈ సందర్భంగా వివిధ పాఠశాలలకు చెందిన విద్యార్థులు పోలీస్ స్టేషన్‌ను సందర్శించి పోలీసుల విధులు, రోజువారీ కార్యకలాపాలు, శాంతిభద్రతల పరిరక్షణలో పోలీసుల పాత్ర గురించి ప్రత్యక్షంగా తెలుసుకున్నారు. అనంతరం సీఐ మాట్లాడుతూ పోలీస్ స్టేషన్‌లో నిర్వహించే విధులు, ప్రజల నుంచి వచ్చే ఫిర్యాదుల స్వీకరణ, వాటి పరిష్కారానికి తీసుకునే చర్యలను విద్యార్థులకు వివరించారు. అనంతరం విద్యార్థులకు ట్రాఫిక్ నిబంధనలు, రోడ్డు భద్రత, రహదారిపై పాటించాల్సిన జాగ్రత్తలపై అవగాహన కల్పించారు. ప్రస్తుత కాలంలో పెరుగుతున్న సైబర్ నేరాలు, ఆన్‌లైన్ మోసాలు, సోషల్ మీడియా వినియోగంలో తీసుకోవాల్సిన జాగ్రత్తలను వివరించారు. అపరిచిత వ్యక్తుల నుంచి వచ్చే ఫోన్ కాల్స్, లింకులు, సందేశాల పట్ల అప్రమత్తంగా ఉండాలని సూచించారు. మాదకద్రవ్యాల వినియోగం వల్ల కలిగే అనర్థాలు, విద్యార్థుల భవిష్యత్తుపై వాటి ప్రభావం గురించి వివరించి, చెడు వ్యసనాలకు దూరంగా ఉండాలని సూచించారు. విద్యార్థులు క్రమశిక్షణతో చదువుకుంటూ బాధ్యతాయుతమైన పౌరులుగా ఎదగాలని తెలిపారు. పోలీసులు ప్రజల రక్షణ, శాంతిభద్రతల పరిరక్షణ కోసం నిరంతరం పనిచేస్తారని, పోలీస్ మరియు ప్రజల మధ్య సత్సంబంధాలు ఉన్నప్పుడే సమాజంలో శాంతియుత వాతావరణం నెలకొంటుందని వివరించారు. ఏదైనా సమస్య ఎదురైనప్పుడు భయపడకుండా పోలీసుల సహాయం తీసుకోవాలని విద్యార్థులకు సూచించారు. ఈ కార్యక్రమం ద్వారా విద్యార్థులకు పోలీస్ వ్యవస్థపై అవగాహన పెరగడంతో పాటు పోలీసుల విధులు, బాధ్యతలను ప్రత్యక్షంగా తెలుసుకునే అవకాశం లభించింది. ఇలాంటి కార్యక్రమాలు విద్యార్థుల్లో చట్టాల పట్ల గౌరవం, సామాజిక బాధ్యతను పెంపొందించేందుకు దోహదపడతాయని నిర్వాహకులు తెలిపారు. ఈకార్యక్రమంలో ఎస్ఐ రాజేష్, పోలీసు సిబ్బంది, విద్యార్థులు పాల్గొన్నారు.