నీరు లేక వెలవెలబోతున్న మంజీరా ప్రాజెక్టు!

- వర్షాకాలంలోనే తగ్గుతున్న నీటి నిల్వలు
- రానున్న రోజుల్లో హైదరాబాద్ నగర ప్రజలకు తాగునీటి ఇబ్బందులు తప్పవనే ఆందోళన
- కళ్లెపల్లి వద్ద మోటార్లు ఏర్పాటు చేసి నీటిని లిఫ్ట్ చేసి ఉంటే ఈ పరిస్థితి వచ్చేది కాదంటున్న విమర్శకులు

చౌటకూర్ :  సంగారెడ్డి జిల్లాలో పుల్కల్ మండలం పరిధిలోని మంజీరా నది నీటి ప్రవాహం తగ్గిపోవడంతో సింగూరు ప్రాజెక్టు నీటి నిల్వలు క్రమంగా తగ్గి వెలవెలబోతున్నాయి. ఒకప్పుడు సమృద్ధిగా నీటితో కళకళలాడిన సింగూరు ప్రాజెక్టు ప్రస్తుతం నీరు లేక వెలవెలబోతుండటం ఆందోళన కలిగిస్తోంది. ప్రాజెక్టులో నీటి మట్టం తగ్గుతూ డెడ్ స్టోరేజీ దిశగా పయనిస్తుండటంతో భవిష్యత్తులో తాగునీటి అవసరాలపై ప్రశ్నలు తలెత్తుతున్నాయి.

వర్షాకాలంలోనే ప్రాజెక్టులో ఆశించిన స్థాయిలో నీటి నిల్వలు లేకపోవడం పరిస్థితి తీవ్రతను తెలియజేస్తోందని పలువురు అభిప్రాయపడుతున్నారు. ఇదే పరిస్థితి కొనసాగితే రానున్న వేసవిలో తాగునీటి సరఫరాపై తీవ్ర ప్రభావం పడే అవకాశం ఉందని ఆందోళన వ్యక్తం చేస్తున్నారు. ముఖ్యంగా సింగూరు జలాలపై ఆధారపడే ప్రాంతాలతో పాటు హైదరాబాద్ నగరానికి తాగునీటి సరఫరా విషయంలోనూ ఇబ్బందులు ఎదురయ్యే ప్రమాదం ఉందని నిపుణులు హెచ్చరిస్తున్నట్లు తెలుస్తోంది.

మరోవైపు కళ్లెపల్లి వద్ద మోటార్లు ఏర్పాటు చేసి అందుబాటులో ఉన్న నీటిని లిఫ్ట్ చేసి ప్రాజెక్టులోకి తరలించే చర్యలు చేపట్టి ఉంటే ప్రస్తుత పరిస్థితి కొంత మెరుగ్గా ఉండేదని పలువురు విమర్శిస్తున్నారు. ముందస్తు ప్రణాళికతో నీటి నిర్వహణ చేపట్టకపోవడం వల్లే ఈ పరిస్థితి ఏర్పడిందని వారు అభిప్రాయపడుతున్నారు.

ఇప్పటికైనా సంబంధిత అధికారులు, ప్రభుత్వం స్పందించి సింగూరు ప్రాజెక్టులో నీటి నిల్వల పరిస్థితిని సమీక్షించాలని, ప్రత్యామ్నాయ నీటి వనరులపై దృష్టి సారించాలని ప్రజలు కోరుతున్నారు. రానున్న రోజుల్లో తాగునీటి ఎద్దడి తలెత్తకుండా ముందస్తు చర్యలు చేపట్టాలని విజ్ఞప్తి చేస్తున్నారు.