పాఠశాలలో విద్యార్థులకు షూస్, సాక్సుల పంపిణీ

భిక్కనూరు మండలంలోని పెద్దమల్లారెడ్డి ప్రభుత్వ ప్రాథమిక పాఠశాలలో సోమవారం విద్యార్థులకు షూస్, సాక్సుల పంపిణీ కార్యక్రమాన్ని ఘనంగా నిర్వహించారు. పాఠశాలలో పండుగ వాతావరణం నెలకొనగా విద్యార్థులు ఆనందోత్సాహాలతో కార్యక్రమంలో పాల్గొన్నారు.
ఈ కార్యక్రమానికి ముఖ్య అతిథులుగా గ్రామ సర్పంచ్ సాయా గౌడ్, మండల పరిషత్ అభివృద్ధి అధికారి సవితా రెడ్డి, ఉపసర్పంచ్ చైతన్య రెడ్డి, గ్రామపంచాయతీ కార్యదర్శి లక్ష్మి, వార్డు సభ్యులు, డ్వాక్రా సంఘాల సభ్యులు హాజరయ్యారు. వారి చేతుల మీదుగా విద్యార్థులకు షూస్, సాక్సులను పంపిణీ చేశారు.
ఈ సందర్భంగా అతిథులు మాట్లాడుతూ విద్యార్థులు చదువుతో పాటు ఆరోగ్యం, పరిశుభ్రత, క్రమశిక్షణకు ప్రాధాన్యత ఇవ్వాలని సూచించారు. విద్యార్థుల సంక్షేమం కోసం ఇలాంటి కార్యక్రమాలు నిర్వహించడం అభినందనీయమని పేర్కొన్నారు. విద్యార్థులకు అవసరమైన సౌకర్యాలు కల్పించడం ద్వారా పాఠశాలల్లో విద్యాభ్యాసానికి మరింత ప్రోత్సాహం లభిస్తుందని తెలిపారు.
విద్యార్థుల ముఖాల్లో ఆనందం వెల్లివిరిసిన ఈ కార్యక్రమం పాఠశాలలో సందడి నెలకొల్పింది. పాఠశాల అభివృద్ధికి, విద్యార్థుల సంక్షేమానికి సహకరిస్తున్న ప్రజాప్రతినిధులు, అధికారులు, డ్వాక్రా సంఘాల సభ్యులకు పాఠశాల ప్రధానోపాధ్యాయులు, ప్రేమ్ గిరి, సంధ్యారాణి ఉపాధ్యాయ బృందం కృతజ్ఞతలు తెలిపారు.