సింగరేణి సెక్యూరిటీ సిబ్బందికి ఫస్ట్ ఎయిడ్, ఫైర్ ఫైటింగ్ శిక్షణ పూర్తి

కొత్తగూడెం బ్యూరో : సింగరేణి కాలరీస్ కంపెనీ లిమిటెడ్ యస్&పీసీ విభాగం ఆధ్వర్యంలో సెక్యూరిటీ సిబ్బందికి నిర్వహించిన 45వ బ్యాచ్ ఫస్ట్ ఎయిడ్, ఫైర్ ఫైటింగ్ శిక్షణా తరగతులు ముగిశాయి. ఈ నెల 26వ తేదీ నుంచి వారం రోజుల పాటు కొత్తగూడెంలోని యస్&పీసీ ట్రైనింగ్ సెంటర్‌లో నిర్వహించిన ఈ శిక్షణలో సింగరేణి వ్యాప్తంగా అన్ని ఏరియాల నుంచి వచ్చిన 29 మంది సెక్యూరిటీ సిబ్బంది పాల్గొన్నారు. శిక్షణ ముగింపు కార్యక్రమానికి ఏరియా సెక్యూరిటీ అధికారి, ట్రైనింగ్ అధికారి ఎం.డి. జాకీర్ హుస్సేన్ ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ ప్రతి యూనిఫాం సిబ్బందికి ఫస్ట్ ఎయిడ్, ఫైర్ ఫైటింగ్‌పై సంపూర్ణ అవగాహన ఉండటం ఎంతో అవసరమని అన్నారు. విధి నిర్వహణలో అనుకోని ప్రమాదాలు ఎదురైనప్పుడు తక్షణమే స్పందించి ప్రాణాలను కాపాడటంతో పాటు సంస్థ ఆస్తులను పరిరక్షించడంలో ఈ శిక్షణ ఎంతగానో ఉపయోగపడుతుందని తెలిపారు. వారం రోజుల శిక్షణలో ప్రథమ చికిత్స, అగ్నిప్రమాదాల నివారణ, మంటలను అదుపు చేసే పద్ధతులు తదితర అంశాలపై క్షుణ్ణంగా అవగాహన కల్పించినట్లు వివరించారు. ఇందుకోసం సింగరేణి మెయిన్ హాస్పిటల్, మైన్స్ రెస్క్యూ స్టేషన్, భద్రాద్రి కొత్తగూడెం ఫైర్ స్టేషన్ నుంచి నిపుణులైన ఫ్యాకల్టీని ఆహ్వానించి శిక్షణ అందించినట్లు పేర్కొన్నారు.
ప్రథమ చికిత్సపై అవగాహన ఉంటే ప్రమాద సమయంలో వైద్యుల వద్దకు తీసుకెళ్లేలోపే బాధితులకు ప్రాణాపాయం నుంచి రక్షణ కల్పించే అవకాశం ఉంటుందని చెప్పారు. అలాగే విధులు నిర్వహించే ప్రాంతాల్లో అగ్నిప్రమాదాలు సంభవించినప్పుడు సత్వరమే స్పందించి వాటిని నివారించడం ద్వారా సింగరేణి ఆస్తులను కాపాడవచ్చని అన్నారు.
సెక్యూరిటీ సిబ్బంది మెరుగైన వృత్తి నైపుణ్యాన్ని పెంపొందించుకోవడంతో పాటు క్రమశిక్షణ, నీతి నిజాయితీ, అంకితభావంతో విధులు నిర్వహించాలని, సమాజాభివృద్ధికి కూడా తమ వంతు కృషి చేయాలని సూచించారు.

సేవా కార్యక్రమాలు.. ప్రతిభకు పురస్కారాలు

ఈ సందర్భంగా సెక్యూరిటీ సిబ్బంది సహకారంతో శ్రీజ్యోతి అనాథ వృద్ధుల శరణాలయ నిర్వాహకులకు నిత్యావసర సరుకులను పంపిణీ చేశారు. శిక్షణా కోర్సులో ఉత్తమ ప్రతిభ కనబరిచిన ఎస్. రాంబాబు, జె. రంగారెడ్డిలకు బహుమతులు అందజేసి అభినందించారు.
కార్యక్రమంలో ట్రైనింగ్ ఇన్‌స్పెక్టర్ డి. నారాయణరెడ్డి వందన సమర్పణ చేయగా, జూనియర్ ఇన్‌స్పెక్టర్ కె. రాజనర్సు, ట్రైనింగ్ సిబ్బంది తదితరులు పాల్గొన్నారు.