మల్హర్ : జయశంకర్ భూపాలపల్లి జిల్లా మల్హర్ మండలంలోని అడ్వాలపల్లి గ్రామంలో కరీంనగర్ జిల్లా సహకార కేంద్ర బ్యాంకు కే డి సి సి బి (KDCCB) తాడిచర్ల శాఖ ఆధ్వర్యంలో ఆర్థిక అక్షరాస్యత, నగదు రహిత లావాదేవీలపై అవగాహన కార్యక్రమం నిర్వహించారు. గ్రామ సర్పంచ్ అజ్మీరా సారక్క అధ్యక్షతన జరిగిన ఈ కార్యక్రమంలో బ్యాంకు అధికారులు గ్రామ ప్రజలకు పలు బ్యాంకింగ్ సేవలు, ప్రభుత్వ పథకాలపై అవగాహన కల్పించారు.ఈ సందర్భంగా బ్యాంకు మేనేజర్ దుమ్మని లక్ష్మణ్ మాట్లాడుతూ ప్రతి ఒక్కరూ బ్యాంకుల్లో సేవింగ్స్ ఖాతాలు ప్రారంభించి పొదుపు అలవాటును పెంపొందించుకోవాలని సూచించారు. KDCCB బ్యాంకులో డిపాజిట్లపై ఆకర్షణీయమైన వడ్డీ రేట్లు అందుబాటులో ఉన్నాయని తెలిపారు. బ్యాంకు ద్వారా పంట రుణాలు, వ్యవసాయ రుణాలు, తనఖా రుణాలు, గృహ నిర్మాణ రుణాలు, విద్యా రుణాలు, బంగారు ఆభరణాలపై రుణాలు అందిస్తున్నట్లు వివరించారు.తీసుకున్న రుణాలను సకాలంలో చెల్లించడం ద్వారా క్రెడిట్ స్కోర్ మెరుగుపడుతుందని, భవిష్యత్తులో రుణాలు పొందేందుకు ఇది ఉపయోగపడుతుందని పేర్కొన్నారు. ప్రధానమంత్రి సురక్ష బీమా యోజన, ప్రధానమంత్రి జీవన్ జ్యోతి బీమా యోజన వంటి పథకాల ద్వారా తక్కువ ప్రీమియంతో బీమా రక్షణ పొందవచ్చని వివరించారు.
డిజిటల్ లావాదేవీలు నిర్వహించే సమయంలో ప్రజలు అప్రమత్తంగా ఉండాలని, అపరిచిత వ్యక్తులతో ఓటీపీ, బ్యాంకు ఖాతా వివరాలు, ఇతర రహస్య సమాచారాన్ని ఎట్టి పరిస్థితుల్లోనూ పంచుకోవద్దని సూచించారు. ఖాతాదారుల విలువైన వస్తువుల భద్రత కోసం బ్యాంకులో లాకర్ సదుపాయం కూడా అందుబాటులో ఉందని తెలిపారు.బ్యాంకు అందిస్తున్న వివిధ సేవలను సద్వినియోగం చేసుకొని పొదుపు అలవాటును పెంపొందించుకుంటూ ఆర్థికంగా అభివృద్ధి చెందాలని గ్రామ ప్రజలకు సూచించారు.ఈ కార్యక్రమంలో బీఆర్ఎస్ జిల్లా యువజన నాయకులు అజ్మీరా బాలాజీ నాయక్, ఉపసర్పంచ్ బానోత్ రాజేందర్, సీఏఫ్ఎల్ ప్రతినిధి శ్రీనివాస్, పంచాయతీ కార్యదర్శి సరస్వతి, సీఈఓ సంతోష్, బ్యాంకు ఫీల్డ్ ఆఫీసర్ భాస్కర్, అసిస్టెంట్ మేనేజర్ సదయ్య, బ్యాంకు సిబ్బంది, సంఘాల సిబ్బంది, రైతులు, గ్రామ ప్రజలు పాల్గొన్నారు.
.jpeg)
