చౌటకూర్ మండలంలో బీజేపీ బలోపేతానికి కృషి

   శివ్వంపేటలో బీజేపీలో చేరిన నూతన కార్యకర్తలు.

   అందోల్ గడ్డపై బీజేపీ జెండా ఎగురవేయడమే లక్ష్యం: నాయకులు

చౌటకూర్: సంగారెడ్డి జిల్లా బీజేపీ నాయకత్వం ఆధ్వర్యంలో చౌటకూర్ మండలం శివ్వంపేట గ్రామంలో నూతన కార్యకర్తలు భారతీయ జనతా పార్టీలో చేరినట్లు తెలిసింది. ఈ కార్యక్రమంలో ఎమ్మెల్సీ అంజిరెడ్డి, గోదావరి, మాజీ జహీరాబాద్ పార్లమెంట్ సభ్యుడు బీబీ పాటిల్ నాయకుల సమక్షంలో కార్యకర్తల చేరికలు జరిగాయి. ఈ సందర్భంగా బీజేపీ నాయకులు మాట్లాడుతూ చౌటకూర్ మండలంలో పార్టీని గ్రామస్థాయి నుంచి మరింత బలోపేతం చేయాలని పిలుపునిచ్చారు. రాబోయే ఎన్నికల్లో అందోల్ నియోజకవర్గంలో బీజేపీ విజయానికి ప్రతి కార్యకర్త కృషి చేయాలని, ప్రజల్లో పార్టీ సిద్ధాంతాలను విస్తృతంగా తీసుకెళ్లాలని సూచించారు. పార్టీలో చేరిన నూతన కార్యకర్తలకు స్వాగతం పలుకుతూ, వారి సహకారంతో పార్టీని మరింత బలోపేతం చేస్తామని తెలిపారు, గతంలో బీఆర్ఎస్ ప్రభుత్వం ఇచ్చిన హామీలు, ప్రస్తుతం కాంగ్రెస్ ప్రభుత్వం ఎన్నికల సమయంలో ప్రకటించిన హామీల అమలుపై ప్రజలు ప్రశ్నించాలని బీజేపీ నాయకులు పేర్కొన్నారు. ఎన్నికల సమయంలో ఇచ్చిన హామీలను నెరవేర్చడం ప్రభుత్వాల బాధ్యత అని అన్నారు. ప్రజలకు ఇచ్చిన హామీల అమలులో జాప్యం జరిగితే ప్రభుత్వాలను నిలదీయాలని పిలుపునిచ్చారు.

రైతులు, యువత, మహిళలు, విద్యార్థుల సమస్యలను పరిష్కరించడంతో పాటు, యువతకు ఉద్యోగావకాశాలు కల్పించడం, రైతులకు అండగా నిలవడం, విద్యార్థులకు మెరుగైన విద్యా సదుపాయాలు అందించడం ప్రభుత్వాల బాధ్యత అని పేర్కొన్నారు. ప్రజల ఆకాంక్షలకు అనుగుణంగా పాలన సాగాలని, అభివృద్ధి మరియు సంక్షేమానికి ప్రాధాన్యత ఇవ్వాలని అన్నారు. ప్రధానమంత్రి నరేంద్ర మోదీ నాయకత్వంలో కేంద్ర ప్రభుత్వం చేపడుతున్న అభివృద్ధి కార్యక్రమాలు, సంక్షేమ పథకాలను ప్రజల్లోకి తీసుకెళ్లాలని కార్యకర్తలకు సూచించారు. గ్రామస్థాయిలో ప్రజలతో మమేకమై వారి సమస్యలపై పోరాడుతూ పార్టీని బలోపేతం చేయాలని పిలుపునిచ్చారు. చౌటకూర్ మండలంలోని ప్రతి గ్రామంలో బీజేపీకి ప్రజాదరణ పెంచుతూ, రాబోయే ఎన్నికల్లో అందోల్ నియోజకవర్గంలో పార్టీ  విజయానికి సమష్టిగా కృషి చేస్తామని నాయకులు ధీమా వ్యక్తం చేశారు.