టేకులపల్లి :టేకులపల్లి మండలం శంభునిగూడెం గ్రామపంచాయతీ పరిధిలోని డంపింగ్ షెడ్ వద్ద జరిగినట్లు ప్రచారం జరుగుతున్న ఓ అనుమానాస్పద ఘటన ఆలస్యంగా వెలుగులోకి రావడంతో స్థానికంగా చర్చనీయాంశంగా మారింది. డంపింగ్ షెడ్లో గోవు మాంసం కోసినట్లు గ్రామంలో ప్రచారం జరుగుతుండటంతో గ్రామస్తులు తీవ్ర ఆందోళన వ్యక్తం చేస్తున్నారు.స్థానికుల కథనం ప్రకారం, ఇటీవల కొందరు వ్యక్తులు డంపింగ్ షెడ్ వద్ద అనుమానాస్పదంగా కనిపించారని, అనంతరం అక్కడ మాంసం కోసిన ఆనవాళ్లు కనిపించాయని చెబుతున్నారు. ఈ నేపథ్యంలో అది గోవు మాంసమేనా, లేక ఇతర జంతువు మాంసమా అన్నది అధికారికంగా ఇంకా నిర్ధారణ కాలేదు.ఈ ఘటనపై గ్రామస్తులు వెంటనే స్పందించి సంబంధిత అధికారులకు సమాచారం అందించాలని కోరుతున్నారు. సంఘటన స్థలంలో లభించే ఆధారాలను స్వాధీనం చేసుకుని పశుసంవర్ధక శాఖ ద్వారా శాస్త్రీయ పరీక్షలు నిర్వహించాలని డిమాండ్ చేస్తున్నారు. అలాగే పోలీసులు పూర్తి స్థాయిలో విచారణ చేపట్టి, అవసరమైతే ఫోరెన్సిక్ పరీక్షలు నిర్వహించి వాస్తవాలను ప్రజల ముందు ఉంచాలని కోరుతున్నారు.గ్రామపంచాయతీ డంపింగ్ షెడ్ ప్రజా అవసరాల కోసం నిర్మించబడిందని, అలాంటి ప్రదేశాన్ని ఎవరైనా అక్రమ కార్యకలాపాలకు ఉపయోగించి ఉంటే బాధ్యులపై చట్టపరమైన చర్యలు తీసుకోవాలని గ్రామస్తులు అభిప్రాయపడుతున్నారు. భవిష్యత్తులో ఇలాంటి ఘటనలు జరగకుండా డంపింగ్ షెడ్ వద్ద పర్యవేక్షణను పెంచాలని, అవసరమైతే సీసీ కెమెరాలు ఏర్పాటు చేయాలని కూడా సూచిస్తున్నారు. పంచాయతీ కార్యదర్శి స్పందన ఈ విషయమై శంభునిగూడెం గ్రామపంచాయతీ కార్యదర్శిని వివరణ కోరగా, "ఈ ఘటనపై నాకు ఎలాంటి అధికారిక సమాచారం లేదు. విషయం మా దృష్టికి వచ్చింది. సంబంధిత ఉన్నతాధికారులకు సమాచారం అందించి, వాస్తవాలు తెలుసుకుని అవసరమైన చర్యలు తీసుకుంటామని తెలిపారు.
.jpg)
