బాన్సువాడ : వర్ని మండల కేంద్రంలోని 30 పడగల ఆసుపత్రిని మంగళవారం సందర్శించిన బాన్సువాడ శాసనసభ్యులు పోచారం. బాన్సువాడ నియోజవర్గం లోని వర్ని 30 పడకల ప్రభుత్వ ఆసుపత్రి ని సందర్శించి వైద్య సేవల పై ఆరా తీసిన పోచారం శ్రీనివాసరెడ్డి. వర్ని మండల కేంద్రం లోని 30 పడకల ప్రభుత్వ ఆసుపత్రి ని తెలంగాణ రాష్ట్ర ప్రభుత్వ వ్యవసాయ సలహాదారులు, బాన్సువాడ నియోజకవర్గ శాసనసభ్యులు పోచారం శ్రీనివాసరెడ్డి. సందర్శించారు. ఈ సందర్భం గా ఆసుపత్రి లో చికిత్స పొందుతున్న రోగుల  ను స్వయంగా కలిసి వారికి అందుతున్న వైద్య సేవలు, వైద్య సదుపాయాల గురించి అడిగి తెలుసుకున్నారు. రోగుల కు మెరుగైన వైద్యం అందు తుందా లేదా అనే విషయంపై వైద్యుల ను ఆరా తీశారు. అనంతరం డీసీహెచ్‌ఓ శ్రీనివాస్ ప్రసాద్ తో మాట్లాడి ఆసుపత్రిలో అందుబాటులో ఉన్న వైద్య సిబ్బంది వివరాలు, అవసరమైన వైద్య సిబ్బంది నియామకం, ఆసుపత్రికి రావాల్సిన వైద్య పరికరాలు, ఇతర మౌలిక సదుపాయాల గురించి చర్చించారు. ప్రభుత్వ ఆసుపత్రులకు వచ్చే పేద, మధ్యతరగతి ప్రజలకు మెరుగైన వైద్య సేవలు అందేలా చూడాలని, రోగులకు ఎలాంటి ఇబ్బందులు కలగకుండా అవసరమైన చర్యలు తీసుకోవాలని ఈ సందర్భంగా వైద్య అధికారుల కు పలు సూచనలు చేశారు.

ఈ కార్యక్రమానికి ముఖ్య అతిథిగా హాజరైన HMDA మెట్రోపాలిటన్ కమిషనర్, ప్రభుత్వ కార్యదర్శి (మెట్రోపాలిటన్ ఏరియా అండ్ అర్బన్ డెవలప్‌మెంట్ – HMDA పరిధి), GHMC ప్రత్యేక అధికారి సర్ఫరాజ్ అహ్మద్, IAS కీలకోపన్యాసం చేశారు. పట్టణాల అభివృద్ధిలో పారిశుధ్య నిర్వహణ, వ్యర్థాల శాస్త్రీయ నిర్వహణ, ఆధునిక విధానాల అమలు, అధికారుల సామర్థ్య పెంపు వంటి అంశాల ప్రాధాన్యతను ఈ కార్యక్రమం ద్వారా వివరించారు. ఈ సందర్భంగా అడ్మినిస్ట్రేటివ్ స్టాఫ్ కాలేజ్ ఆఫ్ ఇండియా (ASCI), గ్రేటర్ హైదరాబాద్ మున్సిపల్ కార్పొరేషన్ (GHMC) మధ్య అవగాహన ఒప్పందం (MoU) మార్పిడి జరిగింది. పట్టణ పాలనలో సంస్థాగత సహకారాన్ని బలోపేతం చేయడం, మున్సిపల్ అధికారులకు శిక్షణ, నైపుణ్యాభివృద్ధి కల్పించడం, మెరుగైన పట్టణ పరిపాలనకు అవసరమైన కార్యాచరణను ప్రోత్సహించడం ఈ ఒప్పందం ప్రధాన ఉద్దేశం. ఈ కార్యక్రమంలో GHMC కమిషనర్ ఆర్.వి. కర్ణన్, IAS, డాక్టర్ ఎన్. రమేష్ కుమార్, IAS (రిటైర్డ్), డాక్టర్ బి. జనార్ధన్ రెడ్డి, IAS (రిటైర్డ్), డాక్టర్ ఎం. స్నేహలత, డాక్టర్ వల్లి మణిక్కం, డాక్టర్ ఓ.పి. సింగ్, ఉదయ్ సింగ్ గౌతమ్,  కె.బి. రంజిత్ కుమార్, డి. ఫణి కృష్ణ తదితర ప్రముఖులు, ఉన్నతాధికారులు, మున్సిపల్ అధికారులు పాల్గొన్నారు. పట్టణాల్లో పారిశుధ్య ప్రమాణాలను పెంపొందించడం, చెత్త నిర్వహణలో ఆధునిక పద్ధతులను ప్రవేశపెట్టడం, స్వచ్ఛ సర్వేక్షణ్‌లో మెరుగైన ప్రమాణాలను సాధించడం, ప్రజలకు మెరుగైన మున్సిపల్ సేవలు అందించడం వంటి లక్ష్యాల సాధనకు ఈ శిక్షణ కార్యక్రమం దోహదపడనుంది.

న్యాయం జరిగే వరకు విధుల్లో చేరే ప్రసక్తిలేదు 

నల్గొండ/మర్రిగూడ : ఉన్నతాధికారుల తీవ్రమైన మానసిక ఒత్తిళ్లు, అనుచిత వేధింపులను నిరసిస్తూ నల్గొండ జిల్లా మర్రిగూడ మండల పరిధిలోని పంచాయతీ కార్యదర్శులు ఆందోళన బాటపట్టారు. మండలంలోని మొత్తం 16 మంది కార్యదర్శులు ఒక్కసారిగా ముకుమ్మడిగా సెలవులో వెళ్లాలని సంచలన నిర్ణయం తీసుకున్నారు. ఈ మేరకు మంగళవారం మధ్యాహ్నం మండల పరిషత్ కార్యాలయంలో ఎంపీడీఓ జి.సి.మునయ్యను కలసి తమ ముకుమ్మడి సెలవు అభ్యర్థన వినతిపత్రాన్ని అందజేశారు.

నిత్యం మానసిక నరకం... భరించలేకే ఈ నిర్ణయం

మండల పంచాయతీ కార్యదర్శుల సంఘం అధ్యక్షుడు వంశీ మాట్లాడుతూ కార్యదర్శుల ఆవేదనను వెళ్లగక్కారు. నిత్యం విధి నిర్వహణలో క్షేత్రస్థాయి సమస్యలతో పాటు ఉన్నతాధికారుల నుంచి ఎదురవుతున్న తీవ్ర మానసిక ఒత్తిళ్లు, వేధింపులతో సతమతమవుతున్నామని ఆందోళన వ్యక్తం చేశారు. సమయంతో నిమిత్తం లేకుండా అప్పగించే అదనపు బాధ్యతలు, సాధ్యాసాధ్యాలను పరిగణనలోకి తీసుకోకుండా లక్ష్యాలను నిర్దేశించడం, పై అధికారుల వేధింపులతో మానసిక ప్రశాంతత కరువైందని వాపోయారు. రోజురోజుకూ ఈ ఒత్తిడి భరించరాని స్థాయికి చేరడంతోనే వేరే దారి లేక ఈ తీవ్ర నిర్ణయం తీసుకోవాల్సి వచ్చిందని స్పష్టం చేశారు. క్షేత్రస్థాయిలో స్తంభించిన పాలన. ఒకేసారి మండలంలోని 16 గ్రామాల పంచాయతీ కార్యదర్శులు విధులను బహిష్కరించి ముకుమ్మడి సెలవు పెట్టడంతో గ్రామాల్లో పంచాయతీ పాలన తీవ్రంగా ప్రభావితమయ్యే అవకాశం కనిపిస్తోంది. పారిశుద్ధ్యం, తాగునీటి సరఫరా, జనన-మరణ ధ్రువీకరణ పత్రాలు, పన్నుల వసూలు వంటి నిత్యావసర సేవలకు అంతరాయం కలిగే ప్రమాదం ఉంది.

సమస్యలు తీరే వరకు వెనక్కి తగ్గేదే లేదు! తాము ఎదుర్కొంటున్న వేధింపులపై సమగ్ర విచారణ జరిపి నివేదిక సేకరించాలని, తమ సమస్యలకు శాశ్వత పరిష్కారం చూపి తగిన న్యాయం చేయాలని పంచాయతీ కార్యదర్శులు డిమాండ్ చేశారు. సమస్యలు పరిష్కారమయ్యేంత వరకు తిరిగి విధుల్లోకి చేరే ప్రసక్తే లేదని తేల్చి చెప్పారు. ఈ నిరసన కార్యక్రమంలో మండల పరిధిలోని 16 గ్రామాల పంచాయతీ కార్యదర్శులు అందరూ పాల్గొని సంఘీభావం తెలిపారు.కాగా, మండల కార్యదర్శుల ముకుమ్మడి సెలవు నిర్ణయంపై ఉన్నతాధికారులు ఎలా స్పందిస్తారో, గ్రామాల్లో ప్రత్యమ్నాయ ఏర్పాట్లు ఏం చేస్తారో వేచి చూడాల్సి ఉంది.

మూఢనమ్మకాలకు దూరంగా ఉండాలి.. ఆరోగ్య సమస్యలకు వైద్యులను సంప్రదించాలి

గంజాయి, మత్తు పదార్థాలకు దూరంగా ఉండాలి.

*చదువు ఒక్కటే భవిష్యత్తును మార్చే ఆయుధం – జిల్లా ఎస్పీ అఖిల్ మహాజన్ 

ఆదిలాబాద్ బ్యూరో : ఆదిలాబాద్ జిల్లా ఆదివాసీ గ్రామాల ప్రజలకు మెరుగైన వైద్య సదుపాయాలు అందించడంతో పాటు, ప్రజల్లో అవగాహన పెంపొందించి గ్రామాల అభివృద్ధికి తోడ్పడాలనే లక్ష్యంతో చెరువుగూడ గ్రామంలో పోలీసు మీకోసం కార్యక్రమాన్ని నిర్వహించారు. ఈ కార్యక్రమంలో భాగంగా 6 గ్రామాల ప్రజలకు 6 విభాగాలకు చెందిన వైద్య నిపుణులతో ఉచిత వైద్య శిబిరాన్ని ఏర్పాటు చేశారు. సుమారు 300 మంది గ్రామ ప్రజలు, విద్యార్థినీ విద్యార్థులు పాల్గొన్నారు.
ఈ సందర్భంగా జిల్లా ఎస్పీ అఖిల్ మహాజన్  మాట్లాడుతూ.. మూఢనమ్మకాలు, బాబాలను నమ్మకుండా ఆరోగ్య సమస్యలు వచ్చినప్పుడు సమీపంలోని ప్రభుత్వ లేదా ప్రైవేటు వైద్యులను సంప్రదించాలని సూచించారు. ప్రజలకు మెరుగైన వైద్య సేవలు అందించాలనే ఉద్దేశంతో ఉచిత వైద్య శిబిరాన్ని ఏర్పాటు చేసినట్లు తెలిపారు. గంజాయి, మత్తు పదార్థాలకు దూరంగా ఉండాలని, గంజాయి సాగు చేయడం వల్ల ప్రభుత్వ సంక్షేమ పథకాలకు అర్హత కోల్పోయే అవకాశం ఉందని తెలిపారు. యువత చెడు మార్గాలకు దూరంగా ఉంటూ గ్రామ అభివృద్ధిలో భాగస్వాములు కావాలని, సంఘ విద్రోహ శక్తులకు దూరంగా ఉన్నప్పుడే గ్రామాల్లో ప్రశాంతత, అభివృద్ధి సాధ్యమవుతుందని పేర్కొన్నారు. బాలబాలికలకు సమాన విద్యా అవకాశాలు కల్పించి ఉన్నత భవిష్యత్తుకు బాటలు వేయాలని, చదువు ఒక్కటే జీవితాన్ని మార్చగల శక్తివంతమైన ఆయుధమని తెలిపారు. విద్యార్థులు కష్టపడి చదివి ఉన్నత లక్ష్యాలను సాధించి తమ గ్రామానికి మంచి పేరు తీసుకురావాలని సూచించారు. మహిళలు, విద్యార్థినులు ఎలాంటి సమస్యలు ఎదురైనా పోలీసు అక్క లేదా డయల్ 112 ద్వారా పోలీసులను సంప్రదించాలని, సమస్యలను నిర్భయంగా తెలియజేయాలని సూచించారు. తల్లిదండ్రులు బాల్యవివాహాలకు దూరంగా ఉండాలని, బాల్యవివాహాల సమాచారం తెలిసిన విద్యార్థినులు పోలీసులకు నిర్భయంగా సమాచారం అందించాలని తెలిపారు. యువత ఉద్యోగ అవకాశాలను అందిపుచ్చుకొని ఉన్నత స్థాయికి ఎదగాలని, రోడ్డు భద్రతా నియమాలు పాటిస్తూ ప్రమాదాల నివారణకు ప్రతి ఒక్కరూ బాధ్యతగా వ్యవహరించాలని సూచించారు. ద్విచక్ర వాహనదారులు తప్పనిసరిగా హెల్మెట్ ధరించాలని, మద్యం సేవించి వాహనాలు నడపవద్దని, విద్యార్థులు తమ తల్లిదండ్రులు హెల్మెట్ ధరించేలా ప్రోత్సహించాలని తెలిపారు. ఈ కార్యక్రమంలో భాగంగా ఆరు విభాగాలకు చెందిన వైద్య నిపుణులచే ఉచిత వైద్య సేవలు అందించారు. కంటి సమస్యలు ఉన్నవారికి ఆదిలాబాద్‌లో ఉచితంగా కంటి శస్త్రచికిత్సలు నిర్వహించి, అనంతరం తమ వాహనాల్లో గ్రామానికి తిరిగి చేరవేస్తామని హామీ ఇచ్చారు. విద్యార్థులు, గ్రామ ప్రజలు నిర్వహించిన సాంస్కృతిక కార్యక్రమాలు అందరినీ అలరించాయి. ఈ కార్యక్రమంలో ఉట్నూర్ ఏఎస్పీ రిత్విక్ సాయి కొట్టే ఐపీఎస్, ఉట్నూర్ సీఐ ఎం. ప్రసాద్, ఎస్ఐ జి. విజయ్, ఆదిలాబాద్ నుండి వచ్చిన వైద్యులు డాక్టర్ సందీప్ ఐత్వార్, డాక్టర్ టి. వెంకటేష్, డాక్టర్ ఇందూజ, డాక్టర్ శ్వేత, డాక్టర్ సౌమ్య, డాక్టర్ సాగ్నిక్, గ్రామ పెద్దలు, గ్రామ సర్పంచ్ భగవంతరావు, పోలీసు సిబ్బంది, గ్రామ ప్రజలు, విద్యార్థులు తదితరులు పాల్గొన్నారు.

ఆదిలాబాద్ బ్యూరో : ఆదిలాబాద్ జిల్లా మావల పోలీస్ స్టేషన్ పరిధిలో డబ్బులు రెట్టింపు చేస్తామని నమ్మించి ప్రజలను మోసం చేస్తున్న నలుగురు వ్యక్తులపై కేసు నమోదు చేసి దర్యాప్తు చేపట్టినట్లు మావల పోలీస్ స్టేషన్ ఎస్‌హెచ్‌ఓ బి.డి. ప్రేమ్ కుమార్ తెలిపారు.
భగత్‌సింగ్ నగర్‌కు చెందిన గణేష్ అనే వ్యక్తి గతంలో కామారెడ్డి సమీపంలో విజయ్, రేఖ, బాలాజీ అనే వ్యక్తుల వద్ద రూ.15,000 తీసుకోగా, మూడు నెలల తర్వాత రెట్టింపు నగదు ఇస్తామని వారు నమ్మించారు. అనంతరం జనవరి 28న లక్ష్మి, విజయ్, రేఖ, బాలాజీ అనే నలుగురు వ్యక్తులు భగత్‌సింగ్ నగర్‌కు వచ్చి రూ.30,000 తీసుకున్నారు. అదనంగా మరో రూ.30,000 చెల్లిస్తే అదే రోజు రూ.1,00,000 తిరిగి ఇస్తామని నమ్మించడంతో బాధితుడు ఫోన్ పే, గూగుల్ పే ద్వారా రూ.30,000 బదిలీ చేశాడు.
అనంతరం నిందితులు భోజనం చేసి వస్తామని చెప్పి అంబేద్కర్ చౌక్‌లోని బావర్చి హోటల్‌కు వెళ్లి, భోజనం అనంతరం ఇన్నోవా కారులో పరారయ్యారు. ఈ క్రమంలో నిందితులకు చెందిన వివో మొబైల్ ఫోన్ హోటల్ వద్ద మరిచిపోయి వెళ్లారు. ఆ ఫోన్‌లో నిందితుల ఫోటోలు ఉన్నట్లు బాధితుడు ఫిర్యాదులో పేర్కొన్నారూ. ఇదే తరహాలో మరో 16 మందిని కూడా మోసం చేసినట్లు బాధితుడు ఫిర్యాదు చేయగా, నిందితులు ఫోన్ ద్వారా బెదిరింపులకు పాల్పడినట్లు తెలిపారు.
ఈ ఘటనపై మావల పోలీస్ స్టేషన్‌లో క్రైమ్ నంబర్ 57/2026, భారతీయ న్యాయ సంహిత సెక్షన్ 318(4) రెడ్‌విత్ 3(5) ప్రకారం కేసు నమోదు చేసి దర్యాప్తు చేపట్టినట్లు ఎస్‌హెచ్‌ఓ తెలిపారు.
నిందితుల వివరాలు:
1. లక్ష్మి – పరారీలో ఉంది.
2. విజయ్ @ దాసరి రాజు, తండ్రి గంగారం, వయస్సు 31 సంవత్సరాలు, నివాసం చైతన్య కాలనీ, బాన్సువాడ, కామారెడ్డి జిల్లా.
3. రేఖ – పరారీలో ఉంది.
4. బాలాజీ – కామారెడ్డి జిల్లా, పరారీలో ఉన్నాడు.
ప్రజలు డబ్బులు రెట్టింపు చేస్తామని, తక్కువ సమయంలో అధిక లాభాలు వస్తాయని చెప్పే వ్యక్తుల మాటలను నమ్మి నగదు బదిలీ చేయవద్దని, ఇటువంటి మోసాల పట్ల అప్రమత్తంగా ఉండాలని మావల పోలీస్ స్టేషన్ ఎస్‌హెచ్‌ఓ బి.డి. ప్రేమ్ కుమార్ సూచించారు. ఎవరైనా సైబర్ లేదా ఆర్థిక మోసాలకు గురైతే వెంటనే 1930 హెల్ప్‌లైన్ నంబర్‌కు సమాచారం అందించాలని తెలిపారు.

శిక్షణ పూర్తి చేసిన వారికి ఖాదీ గ్రామోద్యోగ్ మహా విద్యాలయం సర్టిఫికెట్లు

కొత్తగూడెం బ్యూరో  : మహిళలు వృత్తి విద్యా కోర్సులను సద్వినియోగం చేసుకొని స్వయం ఉపాధి అవకాశాలను అందిపుచ్చుకుంటూ ఆర్థికంగా ఎదగాలని సింగరేణి జీఎం (పర్సనల్) వెల్ఫేర్, సీఎస్‌ఆర్ అండ్ సెక్యూరిటీ కే. అజయ్ కుమార్ పిలుపునిచ్చారు. సింగరేణి కార్పొరేట్ ఏరియాలో సింగరేణి సేవా సమితి ఆధ్వర్యంలో మహిళలకు మూడు నెలల పాటు నిర్వహించనున్న ఉచిత వృత్తి శిక్షణ తరగతులను మంగళవారం ఆయన ముఖ్య అతిథిగా హాజరై ప్రారంభించారు. పాత కొత్తగూడెం మహిళలకు టైలరింగ్, బర్లిపిట్ మహిళలకు మగ్గం వర్క్స్, గాజులరాజం బస్తీ మహిళలకు ఫ్యాబ్రిక్ పెయింటింగ్‌లో శిక్షణ అందించనున్నారు.

ఈ సందర్భంగా అజయ్ కుమార్ మాట్లాడుతూ.. ఉద్యోగుల కుటుంబ మహిళలతో పాటు ప్రాజెక్టు ప్రభావిత, పరిసర ప్రాంత మహిళలకు ఉపాధి అవకాశాలు కల్పించి ఆర్థికంగా అభివృద్ధి చెందేలా చేయడమే సింగరేణి సేవా సమితి ప్రధాన లక్ష్యమన్నారు. అందులో భాగంగానే వివిధ వృత్తి విద్యా కోర్సుల్లో ఉచిత శిక్షణ అందిస్తున్నట్లు తెలిపారు. మహిళలు శిక్షణ తరగతులకు క్రమం తప్పకుండా హాజరై, నైపుణ్యాలను పూర్తిస్థాయిలో నేర్చుకొని స్వయం ఉపాధి దిశగా అడుగులు వేయాలని సూచించారు. శిక్షణ పూర్తయిన అనంతరం నిర్వహించే పరీక్షల్లో ఉత్తీర్ణులైన అభ్యర్థులకు హైదరాబాద్‌లోని ఖాదీ గ్రామోద్యోగ్ మహా విద్యాలయం ద్వారా ధ్రువపత్రాలు అందజేయనున్నట్లు వెల్లడించారు. శిక్షణ పొందిన మహిళలు సొంతంగా యూనిట్లు ఏర్పాటు చేసుకోవడంతో పాటు మరికొందరికి ఉపాధి కల్పించే స్థాయికి ఎదగాలని ఆకాంక్షించారు. మహిళలు తయారు చేసిన ఉత్పత్తులను హైదరాబాద్ నాంపల్లి ఎగ్జిబిషన్‌లో స్టాళ్లు ఏర్పాటు చేసి విక్రయించేందుకు కూడా సింగరేణి సంస్థ సహకారం అందిస్తుందని తెలిపారు. ఈ కార్యక్రమంలో డీజీఎం (పర్సనల్) బి. శివ కేశవ రావు, డీవైపీఎం కే. శివ కుమార్, వెల్ఫేర్ పీఏ కే. వరప్రసాద రావు, సేవా కో-ఆర్డినేటర్ ఇజాజ్ షరీఫ్, సేవా సెక్రటరీ మాధవీ స్వర్ణలత, సేవా కో-ఆర్డినేటర్లు రమాదేవి, మీనాక్షి, అరుణ, పద్మావతి, దీప, శిక్షకులు, సేవా సభ్యులు, శిక్షణ అభ్యర్థులు పాల్గొన్నారు.

జీఎం సీహెచ్. వెంకట రమణ

కొత్తగూడెం బ్యూరో : కోల్ మైన్స్ పెన్షన్, సింగరేణి సీపీఆర్‌ఎంఎస్ (CPRMS) మెడికల్ కార్డు పొందుతున్న అర్హులైన మాజీ ఉద్యోగులు, పెన్షనర్లు ప్రతి సంవత్సరం నవంబర్ నెలలో జీవన్ ప్రమాణ్ డిజిటల్ లైఫ్ సర్టిఫికెట్‌ను తప్పనిసరిగా అప్‌డేట్ చేసుకోవాలని కొత్తగూడెం ఏరియా జనరల్ మేనేజర్ సీహెచ్. వెంకట రమణ సూచించారు. ఈ మేరకు మంగళవారం విడుదల చేసిన ప్రకటనలో ఆయన వివరాలు వెల్లడించారు. లైఫ్ సర్టిఫికెట్‌ను డిజిటల్ విధానంలో సులభంగా నమోదు చేసుకునే ప్రక్రియపై అవగాహన కల్పించేందుకు సింగరేణి యాజమాన్యం, రీజినల్ కమిషనర్, సీపీఎఫ్ (CMPF), కొత్తగూడెం రీజియన్ సంయుక్తంగా అవగాహన సదస్సును నిర్వహిస్తున్నట్లు తెలిపారు. ఈ నెల 5, 6 తేదీల్లో రుద్రంపూర్‌లోని సీఈఆర్ క్లబ్‌లో ఉదయం 9 గంటల నుంచి సాయంత్రం 5 గంటల వరకు ఈ సదస్సు కొనసాగుతుందని పేర్కొన్నారు. సింగరేణిలో పనిచేసి పదవీ విరమణ పొందిన మాజీ ఉద్యోగులు, పెన్షనర్లు ఈ అవకాశాన్ని సద్వినియోగం చేసుకోవాలని కోరారు. కోల్ మైన్స్ పెన్షన్‌తో పాటు సీపీఆర్‌ఎంఎస్ మెడికల్ కార్డుల కోసం అవసరమైన జీవన్ ప్రమాణ్ లైఫ్ సర్టిఫికెట్‌ను డిజిటల్ విధానంలో నమోదు చేసుకునేందుకు మాజీ ఉద్యోగులు తమ కుటుంబ సభ్యులతో కలిసి సదస్సుకు హాజరుకావాలని జీఎం విజ్ఞప్తి చేశారు.

*సదస్సు వివరాలు:*
- తేదీలు: నవంబర్ 5, 6 (2026)
- సమయం: ఉదయం 9 గంటల నుంచి సాయంత్రం 5 గంటల వరకు
- వేదిక: సీఈఆర్ క్లబ్, రుద్రంపూర్
- నిర్వహణ: సింగరేణి యాజమాన్యం, CMPF కొత్తగూడెం రీజియన్ అర్హులైన పెన్షనర్లు ఎలాంటి ఇబ్బందులు లేకుండా తమ లైఫ్ సర్టిఫికెట్లను అప్‌డేట్ చేసుకునేందుకు ఈ సదస్సు ఉపయోగపడుతుందని సంస్థ అధికార ప్రతినిధి తెలిపారు.

మల్హర్ రావు : మల్హర్ రావు మండల పరిధిలోని రుద్రారం గ్రామపంచాయతీలో పంచాయతీ కార్యదర్శిపై దుర్భాషలాడుతూ విధులకు ఆటంకం కలిగించారని ఆరోపిస్తూ మండలంలోని పంచాయతీ కార్యదర్శులందరూ నిరసన వ్యక్తం చేశారు.రుద్రారం గ్రామపంచాయతీకి అదనపు బాధ్యతలు నిర్వహిస్తున్న పంచాయతీ కార్యదర్శి బి. శివప్రసాద్‌ను శనివారం గ్రామ సర్పంచ్ చంద్రగిరి సంపత్, 7వ వార్డు సభ్యుడు చంద్రగిరి అశోక్ దుర్భాషలాడుతూ విధులకు ఆటంకం కలిగించారని కార్యదర్శులు పేర్కొన్నారు.
ఈ ఘటనపై స్పందించిన మండలంలోని 12 మంది పంచాయతీ కార్యదర్శులు ఏకమై ఎంపీడీవో క్రాంతికుమార్‌ను కలిసి వినతిపత్రం అందజేశారు. రుద్రారం గ్రామపంచాయతీకి మండలంలోని ఏ పంచాయతీ కార్యదర్శికి కూడా అదనపు బాధ్యతలు అప్పగించకూడదని, కార్యదర్శిపై దుర్భాషలాడిన సర్పంచ్, వార్డు సభ్యుడిపై చట్టపరమైన చర్యలు తీసుకోవాలని ఏకగ్రీవంగా కోరారు.అనంతరం జిల్లా పంచాయతీ అధికారిని కలిసి కూడా వినతిపత్రం సమర్పించారు. విధులు నిర్వహించే ప్రభుత్వ ఉద్యోగుల పట్ల అనుచితంగా ప్రవర్తించే వారిపై చర్యలు తీసుకోవాలని ఈ సందర్భంగా వారు కోరినట్లు తెలిపారు.ఈ కార్యక్రమంలో పంచాయతీ కార్యదర్శులు శివప్రసాద్, సతీష్, సాయి చరణ్, భాస్కర్, మధుకర్, సీహెచ్. రాజు, పి. రాజు, ప్రవీణ్ రాజ్, అపర్ణ, సరస్వతి తదితరులు పాల్గొన్నారు.

అచ్చంపేట (నాగర్కర్నూల్ జిల్లా)  : నాగర్ కర్నూలు జిల్లా అచ్చంపేట పట్టణంలోని లింగాల రోడ్డు యందు ఉన్న భవాని హాస్పిటల్ లో వైద్యుల నిర్లక్ష్యం వల్ల వైద్యం వికటించి బాలింతరాలు మృతి చెందినట్లు బంధువులు ఆరోపిస్తూ ఆందోళనకు దిగారు బల్మూర్ మండలంలోని పోలిశెట్టి పల్లి గ్రామానికి చెందిన పద్మ గర్భిణీ స్త్రీ పురిటి నొప్పులతో డెలివరీ కోసం భవాని హాస్పిటల్కు రావడం జరిగింది ఆదివారం గర్భిణి స్త్రీ డెలివరీ అనంతరం పసిబిడ్డకు జన్మించిన తల్లి పరిస్థితి బాగా లేకపోవడంతో భవాని హాస్పిటల్  వైద్యులు మెరుగైన వైద్యం కోసం హైదరాబాద్ హాస్పిటల్కు పేపర్ చేశారు అక్కడ పద్మ చికిత్స పొందుతూ మృతి చెందడంతో బంధువులు ఆందోళనకు దిగారు భవాని హాస్పిటల్ వైద్యులు నిర్లక్ష్యం వల్లనే బాలింతరాలు పద్మ మృతి చెందిందని మంగళవారం అచ్చంపేట పట్టణంలో భవాని హాస్పిటల్ ముందు ఆందోళనకు దిగారు అనంతరం లింగాల చౌరస్తాలో బంధువులు పెద్ద ఎత్తున బైఠాయించి బాధ్యత కుటుంబానికి న్యాయం చేయాలని పలువురు డిమాండ్ చేశారు కొంతసేపు తీవ్ర ఆందోళన పరిస్థితి నెలకొంది పోలీసులు ఆస్పిటల్ వద్ద ఆందోళన చేస్తున్న సంఘటన వద్దకు వచ్చి ఎలాంటి అవాంచనీయ సంఘటనలు జరగకుండా పోలీసులు గట్టి చర్యలు తీసుకున్నారు

రెండు నెలల్లో తరలిస్తామని అధికారుల హామీ : డంపింగ్ యార్డు తరలింపు అంశంపై స్పందించిన అధికారులు, రెండు నెలల్లో డంపింగ్ యార్డును పూర్తిగా తరలించేందుకు చర్యలు చేపడతామని హామీ ఇచ్చినట్లు నాయకులు వెల్లడించారు. ఈ హామీని అధికారులు ఆచరణలో పెట్టి, నిర్ణీత గడువులోగా తరలింపు ప్రక్రియను పూర్తి చేయాలని వారు కోరారు. శాశ్వత పరిష్కారం వచ్చే వరకు ఉద్యమం : డంపింగ్ యార్డు తరలింపు విషయంలో కేవలం హామీలకే పరిమితం కాకుండా, క్షేత్రస్థాయిలో స్పష్టమైన చర్యలు తీసుకోవాలని బీజేపీ నాయకులు పేర్కొన్నారు. ప్రజలకు శాశ్వత పరిష్కారం లభించే వరకు ప్రజల పక్షాన పోరాటాన్ని కొనసాగిస్తామని స్పష్టం చేశారు. అనోజిగూడ డంపింగ్ యార్డు తరలింపు విషయంలో అధికారులు ఇచ్చిన హామీ మేరకు చర్యలు తీసుకుంటారా? నిర్ణీత రెండు నెలల్లో తరలింపు ప్రక్రియ పూర్తవుతుందా? అన్నది వేచి చూడాల్సి ఉంది. ఈ కార్యక్రమంలో మేడ్చల్ రూరల్ జిల్లా కార్యవర్గ సభ్యులు అజయ్ యాదవ్, జిల్లా బీజేవైఎం ప్రధాన కార్యదర్శి శివనాయక్, ఎమ్మార్పీఎస్ జిల్లా అధ్యక్షులు ప్రణయ్, సీనియర్ నాయకులు వీరారెడ్డి, సత్యనారాయణ రెడ్డి, జిహెచ్ఎంసి బీసీ సంఘం ఉపాధ్యక్షులు అఖిలభారత రజక సంఘం ప్రధాన కార్యదర్శి కొమ్మరాజు సతీష్, జోగు అఖిల్, పరశురాం, డంపింగ్ యార్డ్ బాధితులు,యువకులు తదితరులు పెద్ద ఎత్తున పాల్గొన్నారు.

నిరంతరం గుట్కా తినడం వల్ల నోటి లోపలి చర్మం ప్లాస్టిక్ లాగా గట్టిగా మారిపోతుంది, దీంతో నోరు పూర్తిగా తెరవలేని పరిస్థితి వస్తుంది. దీన్నే సబ్ మ్యూకస్ ఫైబ్రోసిస్ అంటారు. కానీ అసలు ప్రమాదం ఆ తర్వాతే మొదలవుతుంది. ఈ విషపూరిత రసాయనాలు మీ ఆరోగ్యకరమైన కణాల్లోకి చొచ్చుకుపోయి వాటి డి ఎన్ ఏ, ని శాశ్వతంగా దెబ్బతీస్తాయి. డిఎన్ఏ దెబ్బతిన్న తర్వాత మీ నోటి కణాలు అదుపు తప్పి వేగంగా పెరగడం మొదలెడతాయి, ఒకదానిపై ఒకటి పేరుకుపోతాయి. ఈ కణాల విచిత్రమైన గుంపు నెమ్మదిగా పెద్ద క్యాన్సర్ కణితిగా మారి నోటి చర్మాన్ని పూర్తిగా చీల్చేస్తుంది. సకాలంలో పట్టించుకోకపోతే ఈ క్యాన్సర్ కణాలు రక్తం ద్వారా ఊపిరితిత్తులు, లివర్ వరకు చేరి శరీరమంతా వ్యాపిస్తాయి. ఈ వ్యాధికి చికిత్స చాలా బాధాకరంగా ఉంటుంది, సర్జరీ ద్వారా నోరు లేదా దవడలో పెద్ద భాగాన్ని కోసి తీసేయాల్సి వస్తుంది.

మేడ్చల్ మల్కాజ్గిరి జిల్లా : విద్యార్థుల్లో సృజనాత్మకతను వెలికితీయడంతోపాటు, వారిలో విజ్ఞానాన్ని పెంపొందించేందుకు జన విజ్ఞాన వేదిక ఆధ్వర్యంలో నిర్వహిస్తున్న చెకుముకి టాలెంట్‌ టెస్టులు దోహదపడతాయని మేడ్చల్‌ మల్కాజిగిరి జిల్లా విద్యాశాఖ అధికారి రేణుకాదేవి అన్నారు. జన విజ్ఞాన వేదిక ఆధ్వర్యంలో నిర్వహించనున్న చెకుముకి టాలెంట్‌ టెస్ట్‌ వాల్‌ పోస్టర్‌ను సోమవారం కలెక్టరేట్ కార్యాలయంలోని విద్యాశాఖ చాంబర్లో ఆమె ఆవిష్కరించారు. ఈ సందర్భంగా విద్యాశాఖ అధికారి మాట్లాడుతూ, విద్యార్థులు పాఠ్యాంశాలతోపాటు సమకాలీన అంశాలపై అవగాహన పెంచుకోవాలని సూచించారు. ఇలాంటి కార్యక్రమాలు విద్యార్థుల్లో చదువుపై ఆసక్తిని పెంచడంతోపాటు, వారి ప్రతిభను ప్రదర్శించేందుకు చక్కని వేదికగా నిలుస్తాయని పేర్కొన్నారు.

శాస్త్రీయ దృక్పథం అలవర్చుకోవాలి : ఈ సందర్భంగా జన విజ్ఞాన వేదిక రాష్ట్ర ఉపాధ్యక్షుడు ఎం.శ్రీనివాస్ మాట్లాడుతూ.. విద్యార్థుల్లో శాస్త్రీయ ఆలోచనా విధానాన్ని పెంపొందించడంతోపాటు, వారిలో దాగి ఉన్న ప్రతిభను వెలికితీసేందుకు చెకుముకి టాలెంట్‌ టెస్టులు దోహదపడతాయని అన్నారు. విద్యార్థులు మూఢనమ్మకాలకు దూరంగా ఉంటూ, ప్రతి అంశాన్ని శాస్త్రీయ దృక్పథంతో పరిశీలించాలని సూచించారు. విద్యార్థుల్లో ప్రశ్నించే తత్వాన్ని, పరిశీలనా శక్తిని పెంపొందించేందుకు జన విజ్ఞాన వేదిక ఆధ్వర్యంలో ఇలాంటి కార్యక్రమాలు నిర్వహిస్తున్నట్లు తెలిపారు.. ఈ టాలెంట్‌ టెస్టులను నవంబర్‌ 12న పాఠశాల స్థాయిలో, నవంబర్‌ 21న మండల స్థాయిలో, నవంబర్‌ 28న జిల్లా స్థాయిలో నిర్వహించనున్నట్లు తెలిపారు. అనంతరం డిసెంబర్‌ 11, 12, 13 తేదీల్లో రాష్ట్రస్థాయి పోటీలు నిర్వహించనున్నట్లు వెల్లడించారు. విద్యార్థులు ఈ అవకాశాన్ని సద్వినియోగం చేసుకొని ప్రతిభను చాటుకోవాలని కోరారు. ఈ కార్యక్రమంలో మేడ్చల్ జిల్లా ఎడి, జన విజ్ఞాన వేదిక మేడ్చల్ జిల్లా ప్రధాన కార్యదర్శి టి.శ్రీనివాస్, కోశాధికారి జెన్నీ, కీసర మండలం ప్రధాన కార్యదర్శి, రిటైర్డ్ హెడ్ మాస్టర్ శేషగిరిరావు, సీనియర్ రిపోర్టర్ వెంకటేశ్వరరావు, తదితరులు పాల్గొన్నారు.

చౌటకూర్  : సంగారెడ్డి జిల్లా చౌటకూర్ మండలం శివంపేట గ్రామంలో నెలకొన్న నీటి సమస్యపై గ్రామస్థులు ఆందోళన వ్యక్తం చేస్తున్నారు. గ్రామంలో ప్రజలు తాగునీటి కోసం ఇబ్బందులు పడుతున్న సమయంలో, గ్రామ పరిధిలోని బీరు పరిశ్రమకు మంజీరా నది నుంచి అనుమతులు లేకుండా భారీ మొత్తంలో నీటిని తరలిస్తున్నారని గ్రామస్థులు ఆరోపిస్తున్నారు. గ్రామ పంచాయతీ నుంచి ఎలాంటి అనుమతులు పొందకుండా ప్రతిరోజూ లక్షల లీటర్ల నీటిని పరిశ్రమ అవసరాల కోసం వినియోగిస్తున్నారని వారు తమ ఫిర్యాదులో పేర్కొన్నారు. ప్రస్తుతం ఎల్‌నినో ప్రభావంతో వాతావరణ పరిస్థితుల్లో మార్పులు చోటుచేసుకోవడం, వర్షాభావ పరిస్థితుల కారణంగా గ్రామంలో నీటి ఎద్దడి తీవ్రంగా ఉందని గ్రామస్థులు ఆవేదన వ్యక్తం చేస్తున్నారు. గ్రామ ప్రజలకు కనీసం తాగునీరు అందించడమే కష్టంగా మారిన పరిస్థితుల్లో పరిశ్రమకు పెద్ద మొత్తంలో నీటిని తరలించడం ఎంతవరకు సమంజసమని ప్రశ్నిస్తున్నారు. ప్రజల అవసరాలకు ప్రాధాన్యత ఇవ్వాల్సిన సమయంలో పరిశ్రమ అవసరాల కోసం నీటిని వినియోగించడం వల్ల గ్రామ ప్రజలకు ఇబ్బందులు ఎదురవుతున్నాయని వారు అభిప్రాయపడుతున్నారు.

పరిశ్రమ నీటి వినియోగంపై విచారణ జరపాలి

మంజీరా నది నుంచి పరిశ్రమకు నీటిని తరలించేందుకు సంబంధిత శాఖల నుంచి అవసరమైన అనుమతులు ఉన్నాయా? లేవా? అనే విషయంపై అధికారులు సమగ్ర విచారణ చేపట్టాలని గ్రామస్థులు కోరుతున్నారు. గ్రామ పంచాయతీ అనుమతులు, సంబంధిత శాఖల అనుమతులు లేకుండా నీటిని తరలిస్తున్నట్లు తేలితే పరిశ్రమ యాజమాన్యంపై చట్టపరమైన చర్యలు తీసుకోవాలని డిమాండ్ చేస్తున్నారు.

 ప్రజలకు తాగునీరు.. రైతులకు సాగునీరు అందించాలి

గ్రామంలో తాగునీటి సమస్యను తక్షణమే పరిష్కరించాలని, రైతుల సాగునీటి అవసరాలను కూడా దృష్టిలో ఉంచుకుని నీటి వినియోగంపై అధికారులు ప్రత్యేక దృష్టి సారించాలని గ్రామస్థులు విజ్ఞప్తి చేస్తున్నారు. మంజీరా జలాల వినియోగంపై సమగ్ర పరిశీలన జరిపి, అక్రమ నీటి తరలింపు జరుగుతున్నట్లు నిర్ధారణ అయితే వెంటనే అడ్డుకోవాలని కోరుతున్నారు. ఈ మేరకు సంబంధిత అధికారులకు గ్రామస్థులు వినతిపత్రం సమర్పించి, శివంపేట గ్రామ ప్రజల నీటి కష్టాలను తొలగించేందుకు తక్షణ చర్యలు తీసుకోవాలని విజ్ఞప్తి చేశారు. ఇప్పటికైనా ఉన్నతాధికారులు స్పందించి గ్రామంలో తాగునీటి సమస్యను పరిష్కరించడంతో పాటు, మంజీరా జలాల వినియోగంపై న్యాయబద్ధమైన చర్యలు చేపట్టాలని గ్రామస్థులు కోరుతున్నారు.