చౌటకూర్: సంగారెడ్డి జిల్లా చౌటకూర్ మండలం శివంపేట గ్రామ శివారులో ఉన్న ఏబీఐఎన్ చార్మినార్ బీర్ పరిశ్రమ నుంచి విడుదలవుతున్న కలుషిత జలాల వల్ల మంజీరా నది కాలుష్యానికి గురవుతోందని గ్రామస్తులు తీవ్ర ఆందోళన వ్యక్తం చేస్తున్నారు. పరిశ్రమ నుంచి రసాయనాలతో కూడిన వ్యర్థ జలాలను నేరుగా మంజీరా నదిలోకి వదులుతున్నారని వారు ఆరోపిస్తున్నారు. ముఖ్యంగా వర్షాకాలాన్ని ఆసరాగా చేసుకుని ఈ వ్యర్థ జలాలను నదిలోకి విడుదల చేస్తున్నారని స్థానికులు చెబుతున్నారు. గ్రామస్తుల కథనం ప్రకారం, గతంలో కూడా నదిలో చేపలు మృతిచెందిన ఘటనలు చోటుచేసుకున్నాయని, అప్పటి నుంచే నదీ జలాల కాలుష్యంపై అనుమానాలు వ్యక్తమవుతున్నాయని తెలిపారు. ప్రస్తుతం నదిలోకి చేరుతున్న రసాయన వ్యర్థాల కారణంగా నీటి రంగు మారడంతో పాటు దుర్వాసన వస్తోందని, ఒకప్పుడు తాగునీటి అవసరాలకు ఉపయోగపడిన మంజీరా నీటిని ఇప్పుడు వినియోగించడానికి ప్రజలు భయపడుతున్నారని ఆవేదన వ్యక్తం చేశారు.కలుషిత జలాల ప్రభావంతో పశువులు, పక్షులు, జలచరాల మనుగడకు ముప్పు ఏర్పడుతోందని గ్రామస్తులు పేర్కొన్నారు. అదే విధంగా ఈ నీటిని వినియోగించే ప్రజల ఆరోగ్యంపై కూడా తీవ్ర ప్రభావం పడే ప్రమాదం ఉందని ఆందోళన వ్యక్తం చేస్తున్నారు. మంజీరా నది పరివాహక ప్రాంతంలో నివసించే ప్రజల జీవనాధారం ఈ నదేనని, దానిని కలుషితం చేయడం వల్ల పర్యావరణంతో పాటు ప్రజల జీవన విధానంపైనా తీవ్ర ప్రభావం పడుతుందని వారు తెలిపారు.కాలుష్య నియంత్రణ మండలి అధికారులు, జిల్లా యంత్రాంగం వెంటనే స్పందించి పరిశ్రమ నుంచి విడుదలవుతున్న వ్యర్థ జలాలపై సమగ్ర విచారణ జరపాలని గ్రామస్తులు డిమాండ్ చేశారు. పరిశ్రమ నిబంధనలను ఉల్లంఘించినట్లు తేలితే కఠిన చర్యలు తీసుకోవాలని కోరారు. అలాగే మంజీరా నదిని కాలుష్యం నుంచి రక్షించేందుకు తక్షణ చర్యలు చేపట్టాలని విజ్ఞప్తి చేశారు.సమస్యను అధికారులు నిర్లక్ష్యం చేస్తే ప్రజా సంఘాల ఆధ్వర్యంలో భారీ స్థాయిలో ఆందోళన కార్యక్రమాలు చేపడతామని గ్రామస్తులు హెచ్చరించారు. "మంజీరా మా జీవనాధారం. నదిని కలుషితం చేస్తున్న వారిపై కఠిన చర్యలు తీసుకుని నదిని కాపాడాలి" అని వారు ప్రభుత్వాన్ని కోరారు.