గండిపేట (రంగారెడ్డి): పవిత్రమైన దేవుడి గుడి అని కూడా చూడకుండా, భక్తి భావాన్ని తుంగలో తొక్కి దొంగలు విరుచుకుపడ్డారు. గండిపేట్ మండలం ఖానాపూర్ గ్రామంలోని ప్రసిద్ధ శ్రీశ్రీశ్రీ పోచమ్మ తల్లి దేవాలయంలో అర్ధరాత్రి దుండగులు సృష్టించిన బీభత్సం స్థానికంగా తీవ్ర కలకలం రేపింది. రోజూ వేలాదిమంది భక్తులు దర్శించుకుని మొక్కులు తీర్చుకునే ఈ క్షేత్రంలో.. ఆలయాన్ని గుల్ల చేసి, భక్తుల నమ్మకాన్ని గాలికి వదిలేశారు.
పక్కా స్కెచ్.. పక్కా దోపిడీ!
పక్కా పథకం ప్రకారమే ఆలయంలోకి చొరబడిన దొంగలు ఘాతుకానికి పాల్పడ్డారు. ఆలయంలో ఉన్న హుండీని క్రూరంగా పగులగొట్టడమే కాకుండా, సాక్షాత్తూ అమ్మవారి ఒంటిపై ఉన్న విలువైన బంగారు, వెండి ఆభరణాలను, ఇతర పూజా సామగ్రిని ఊడ్చేశారు. అంతటితో ఆగకుండా తమ ఆచూకీ ఎక్కడ బయటపడుతుందోనన్న భయంతో, ఆలయంలోని సీసీ కెమెరాలకు సంబంధించిన డీడీవీఆర్  ను సైతం వెంట తీసుకెళ్లడం వారి కిరాతకానికి, ముందస్తు ప్లాన్‌కు అద్దం పడుతోంది. ఈ దోపిడీలో సుమారు రూ. 20 లక్షలకు పైగా విలువైన ఆభరణాలు, హుండీలోని భక్తుల స్వచ్ఛంద విరాళాల సొత్తు చోరీకి గురైనట్లు తెలుస్తోంది.
తెలిసిన వారి పనియేనా..?
ఆలయం లోపల ప్రవేశించిన తీరు, డీవీఆర్ ఎక్కడ ఉందో సరిగ్గా గుర్తించి పట్టుకెళ్లడం చూస్తుంటే.. ఈ ఘాతుకానికి పాల్పడింది ఆలయ పరిసరాలపై, రూట్ మ్యాప్‌పై పూర్తిగా అవగాహన ఉన్న స్థానికులు లేదా తెలిసిన వ్యక్తులే అయి ఉంటారని గ్రామ ఆలయ కమిటీ తీవ్ర అనుమానాలు వ్యక్తం చేస్తోంది.
రంగంలోకి దిగిన నార్సింగి పోలీసులు
సంఘటనపై సమాచారం అందుకున్న వెంటనే నార్సింగి పోలీసులు ఘటనా స్థలానికి చేరుకున్నారు. ఆలయ నిర్వాహకుల ఫిర్యాదు మేరకు కేసు నమోదు చేసి, దర్యాప్తు వేగవంతం చేశారు. క్లూస్ టీమ్, డాగ్ స్క్వాడ్ సాయంతో ఆధారాలు సేకరిస్తున్నారు. అమ్మవారి సొత్తును దోచుకెళ్లిన ఆ పాపాత్ములను వెంటనే తేల్చి, కఠినంగా శిక్షించాలని ఖానాపూర్ గ్రామస్థులు, భక్తులు ఆగ్రహంతో డిమాండ్ చేస్తున్నారు.

షాబాద్,(రంగారెడ్డి): తెలంగాణ శాసన మండలి ప్రభుత్వ చీఫ్ విప్ డాక్టర్ పట్నం మహేందర్ రెడ్డి మాతృమూర్తి పట్నం రుక్కమ్మ పార్థివ దేహానికి షాబాద్ మండల కాంగ్రెస్ పార్టీ అధ్యక్షుడు గుడుపల్లి పెంటారెడ్డి పూలమాల వేసి ఘనంగా నివాళులర్పించారు.ఈ సందర్భంగా ఆయన మాట్లాడుతూ,రుక్కమ్మ మరణం పట్నం కుటుంబానికి తీరని లోటని, ఆమె పవిత్ర ఆత్మకు శాంతి చేకూరాలని భగవంతుడిని ప్రార్థిస్తున్నట్లు తెలిపారు.ఈ క్లిష్ట సమయంలో మహేందర్ రెడ్డి కుటుంబ సభ్యులకు మనోధైర్యం, ధైర్యసాహసాలు ప్రసాదించాలని ఆకాంక్షించారు.ఈ కార్యక్రమంలో షాబాద్ మండల వర్కింగ్ ప్రెసిడెంట్ చెన్నయ్య, పీఏసీఎస్ వైస్ చైర్మన్ మల్లేష్,ఉపసర్పంచులు వేణుగోపాల్, దయాకర్ చారి, సర్దార్‌నగర్ ఏఎంసీ డైరెక్టర్ శ్రీరామ్ రెడ్డి, చేవెళ్ల నియోజకవర్గ యువజన ప్రధాన కార్యదర్శి బాలకృష్ణ రెడ్డి, మహేందర్, బందయ్య, మహేందర్ చారి, యువ నాయకులు రవీందర్ రెడ్డి తదితరులు పాల్గొని రుక్కమ్మకు నివాళులర్పించారు.

పెద్ద శంకరంపేట్ : పెద్ద శంకరంపేట్ మండలంలో విద్యాభివృద్ధికి మండల విద్యాధికారి డి వెంకటేశం చేసిన సేవలు చిరస్మరణీయంగా నిలిచిపోతాయని నారాయణఖేడ్ మాజీ ఎమ్మెల్యే భూపాల్ రెడ్డి అన్నారు. శుక్రవారం పెద్ద శంకరంపేటలో బాయ్ కాడికి పద్మయ్య ఫంక్షన్ హాల్ లో మండల విద్యాధికారి. పిఎం శ్రీ బాలికల ఉన్నత పాఠశాల ప్రధానోపాధ్యాయులు డి వెంకటేశం ఉద్యోగ విరమణ అభినందన సభ కార్యక్రమంలో పాల్గొని మాట్లాడారు. ఈ సందర్భంగా మండల విద్యాధికారి డి వెంకటేశం దంపతులను పూలమాలలు శాలువాలతో సన్మానించిన అనంతరం మాట్లాడుతూ 38 సంవత్సరాలుగా విద్యాభివృద్ధికి ఆయన చేసిన సేవలు చిరస్మరణీయం అన్నారు. ఉపాధ్యాయులతో పాటు ప్రతి ఒక్కరితో వెంకటేశం సౌమ్యంగా అందర్నీ కలుపుకొని పోయే వ్యక్తిగా ఉంటారన్నారు. అల్లాదుర్గం సిఐ రేణుక రెడ్డి పెద్ద శంకరంపేట ఎస్సై ప్రవీణ్ రెడ్డి పోలీస్ సిబ్బందితోపాటు. ఆయా ఉపాధ్యాయ సంఘాల రాష్ట్ర జిల్లా మండల నాయకులు ఉద్యోగ విరమణ పొందిన వెంకటేశం పూలమాలలు శాలువాలతో ఘనంగా సన్మానించారు. వివిధ పార్టీల నాయకులు. ఆయా ప్రభుత్వ ప్రైవేటు పాఠశాలల సిబ్బంది . పలువురు ఆయనను శాలువాలతో ఘనంగా సన్మానించారు. ఈ కార్యక్రమంలో ఆయా ఉపాధ్యాయ సంఘాల రాష్ట్ర జిల్లా మండల నాయకులు. వివిధ పార్టీల మండల నాయకులు ఉపాధ్యాయ సిబ్బంది ఉపాధ్యాయులు విద్యార్థులు  అధిక సంఖ్యలో పాల్గొన్నారు.