అలంపూర్   : జోగులాంబ గద్వాల జిల్లా అయిజ మున్సిపాలిటీ పరిధిలోని అక్షర ఉన్నత పాఠశాలలో ఘనంగా సైన్స్ డే & స్వపరిపాలన దినోత్సవం వేడుకలు జరుపుకున్నారు.ఈ వేడుకలను ప్రిన్సిపాల్ యు.మహేందర్ ఆధ్వర్యంలో ఘనంగా నిర్వహించారు. విద్యార్థులు ఉపాధ్యాయ పాత్రలను పోషించి తోటి విద్యార్థులకు పాఠ్యాంశాలను బోధించారు.అనంతరం సైన్స్ డే సందర్భంగా విద్యార్థులు ఏర్పాటు చేసిన పరికరాలను ప్రిన్సిపల్ పరిశీలించారు.ఈ కార్యక్రమంలో పాఠశాల విద్యార్థులు ఉపాధ్యాయులు, తదితరులు పాల్గొన్నారు.

గద్వాల : జోగుళాంబ గద్వాల్ జిల్లా నూతన కలెక్టర్ రిజ్వాన్ బాషా షేక్ ని జిల్లా ఎస్పీ టి. శ్రీనివాసరావు శనివారం మర్యాదపూర్వకంగా కలవడం జరిగింది.  కొత్తగా బాధ్యతలు స్వీకరించిన సందర్భంగా ఎస్పీ  కలెక్టర్ ని కలసి శుభాకాంక్షలు తెలియజేశారు.

అలంపూర్  : తెలంగాణ భవన్‌లో బీఆర్ఎస్ పార్టీ తరఫున గెలిచిన  ఆలంపూర్ నియోజకవర్గంలో విజయం సాధించిన కౌన్సిలర్లను బీఆర్ఎస్ వర్కింగ్ ప్రెసిడెంట్ కేటీఆర్ సన్మానించారు. ఈ కార్యక్రమంలో ఎమ్మెల్సీ చల్లా వెంకట్రామి రెడ్డి, ఎమ్మెల్యే విజయుడు తదితర ముఖ్య నేతలు పాల్గొననున్నారు. ఈ సందర్భంగా కేటీఆర్ మాట్లాడుతూ  ఆలంపూర్, ఐజ, గద్వాల, వడ్డేపల్లి ప్రాంతాల్లో బీఆర్ఎస్‌కు ప్రజలు అందించిన మద్దతు విశేషమని తెలిపారు. రాష్ట్రంలో కాంగ్రెస్ ప్రభుత్వం ఉన్నప్పటికీ నడిగడ్డలో మాత్రం ప్రజల విశ్వాసం ఇప్పటికీ బీఆర్ఎస్‌పైనే ఉందని పేర్కొన్నారు. సర్పంచ్ ఎన్నికల నుంచి మున్సిపల్ ఎన్నికల వరకు మెజారిటీ స్థానాలు గెలుచుకోవడం పార్టీ బలాన్ని నిరూపిస్తోందన్నారు. రాష్ట్రంలో ప్రస్తుతం అరాచక పాలన నడుస్తోందని కేటీఆర్ విమర్శించారు. నాగర్‌కర్నూల్‌లో రెండు నెలల పాప మరణ ఘటన, కోదాడలో దళిత యువకుడు కర్ల రాజేష్ లాకప్ డెత్ వంటి ఘటనలు ప్రభుత్వ వైఫల్యానికి నిదర్శనమన్నారు. ఖమ్మం వెలుగుమట్లలో ఇళ్ల కూల్చివేతలు ప్రజలను రోడ్డున పడేసిన దారుణ చర్యలని ఆక్షేపించారు.
కేసీఆర్ నాయకత్వంలో గతంలో అభివృద్ధి, సంక్షేమం రెండు జోడెడ్లలా ముందుకు సాగాయని, కానీ ప్రస్తుతం రాష్ట్రంలో అవినీతి, అరాచకం జోడెడ్లుగా మారాయని ఆయన విమర్శించారు. చెక్ డ్యామ్‌లు పేల్చడం, పల్లె ప్రకృతి వనాల్లో చెట్ల నరుకులు వంటి చర్యలు రాష్ట్రాన్ని వెనక్కి నెడుతున్నాయని అన్నారు.ఎన్నికల ముందు ఇచ్చిన ఆరు గ్యారెంటీలను కాంగ్రెస్ ప్రభుత్వం అమలు చేయలేదని, రైతు బంధు, ఎరువుల సరఫరా వంటి అంశాల్లో రైతులను తీవ్రంగా నిరాశపరిచిందని కేటీఆర్ పేర్కొన్నారు. ప్రజలకు ఇప్పుడు కాంగ్రెస్ నిజ స్వరూపం అర్థమైందన్నారు.నడిగడ్డ స్ఫూర్తి రాష్ట్రం మొత్తం వ్యాపించాలని కేటీఆర్ పిలుపునిచ్చారు. ఎమ్మెల్సీ చల్లా వెంకట్రామి రెడ్డి ప్రజల సమస్యలపై అంకితభావంతో పనిచేసే నాయకుడని, ఎమ్మెల్యే విజయుడు కూడా అదే తత్వాన్ని కొనసాగిస్తున్నారని ప్రశంసించారు.రాబోయే రోజుల్లో కాంగ్రెస్ పార్టీ కౌన్సిలర్లను ప్రలోభాలకు గురిచేసే ప్రయత్నాలు చేస్తుందని కేటీఆర్ ముందుగానే హెచ్చరించారు.  పార్టీ శ్రేణులు అప్రమత్తంగా ఉండాలని సూచించారు. మరోసారి కేసీఆర్ నాయకత్వంలో గులాబీ జెండా ఎగరడం ఖాయమని ఆయన ధీమా వ్యక్తం చేశారు.

గద్వాల : జోగులాంబ గద్వాల జిల్లా అన్ని రంగాల్లో ముందుండేలా జిల్లా సమగ్ర అభివృద్ధికి అన్ని శాఖల అధికార యంత్రాంగం సమర్థవంతంగా పనిచేయాలని జిల్లా కలెక్టర్ రిజ్వాన్ బాషా షేక్ ఆదేశించారు.  జోగులాంబ గద్వాల జిల్లా నూతన కలెక్టర్ గా శుక్రవారం ఐడిఓసి లోని తన కార్యాలయంలో బాధ్యతలు స్వీకరించిన సందర్భంగా పలువురు జిల్లా అధికారులతో కలెక్టర్ సమావేశమై మాట్లాడారు. ప్రభుత్వ సంక్షేమ పథకాలను అర్హులైన వారందరికీ అందేలా ఆయా శాఖల అధికారులు నిబద్ధతతో పని చేయాలన్నారు. ప్రభుత్వ నిబంధనలను అనుసరించి పౌరులకు నిష్పక్షపాతంగా, పారదర్శకమైన సేవలందించాలన్నారు. ఆయా ప్రభుత్వ శాఖల పనితీరు మెరుగుపడాలంటే అధికారులు తరచూ క్షేత్రస్థాయిలో పర్యటిస్తూ తమ పరిధిలోని పనులను వేగవంతం చేయాలన్నారు. జిల్లాలో అన్ని శాఖల్లో జరుగుతున్న అభివృద్ధి పనులు, భవిష్యత్తులో చేయబోయే పనుల సమగ్ర వివరాల నివేదికను తయారు చేసి అందజేయాలన్నారు. జిల్లాలోని ఆయా శాఖల ఆర్థిక పరిస్థితుల వివరాలను కూడా అందజేయాలన్నారు. రాష్ట్ర స్థాయి నుంచి ఆయా శాఖల ఉన్నతాధికారులు అడిగే ప్రతి సమాచారాన్ని నిర్లక్ష్యం వహించకుండా సకాలంలో పంపించేందుకు సంబంధిత అధికారులు నిబద్ధతతో పనిచేయాలని ఆదేశించారు. విధి నిర్వహణలో నిర్లక్ష్యంగా వ్యవహరించే అధికారులతో కఠినంగా వ్యవహరిస్తానన్నారు.
పీఎండిడికేవై (ప్రధానమంత్రి ధన ధాన్య కృషి యోజన) కు మన జిల్లా కూడా ఎంపిక కావడంతో ఈ పథకాన్ని సమర్థవంతంగా అమలు చేసేందుకు సంబంధిత శాఖల అధికారులందరూ చిత్తశుద్ధితో పనిచేయాలన్నారు. విద్య, వైద్యం, వ్యవసాయం, ఇందిరమ్మ గృహాలు, తదితర శాఖల పనితీరు చెప్పుకోదగ్గ స్థాయిలో ఉండేలా ప్రాధాన్యత ఇవ్వాలన్నారు.  అంతకుముందు జిల్లా కలెక్టర్ రిజ్వాన్ బాషా షేక్ కు పలువురు జిల్లా అధికారులు, కలెక్టరేట్ సిబ్బంది ఘనంగా స్వాగతం పలుకుతూ పుష్పగుచ్చాలు, మొక్కలు అందజేశారు. పలువురు అధికారులు శాలువాతో సన్మానించారు. అనంతరం పలువురు మత పెద్దలు కలెక్టర్ ను కలిసి శుభాకాంక్షలు తెలిపి, ఆశీర్వచనం చేశారు. ఈ కార్యక్రమంలో అదనపు కలెక్టర్లు లక్ష్మీనారాయణ (రెవిన్యూ), నర్సింగరావు (స్థానిక సంస్థలు), ఆర్డీవో శ్రీనివాసరావు, కలెక్టరేట్ ఏవో భూపాల్ రెడ్డి, పలువురు జిల్లా అధికారులు, కలెక్టరేట్ సిబ్బంది, తదితరులు పాల్గొన్నారు.

గద్వాల   : జోగులాంబ గద్వాల జిల్లా కేంద్రంలోని 3వ వార్డులో గురువారం రాత్రి వీధి కుక్కలు స్వైరవిహారం చేశాయి. స్థానిక రైతు సురేష్‌కు చెందిన గేదెలపై కుక్కలు దాడి చేయడంతో, తీవ్ర గాయాలపాలై మూడు గేదెలు మృతి చెందాయి. విషయం తెలుసుకున్న కౌన్సిలర్ నాగులు యాదవ్, బీఆర్ఎస్ నాయకులు రంజిత్ కుమార్, అఖిల్ రెడ్డి బాధిత రైతును పరామర్శించారు. పట్టణంలో వీధి కుక్కల బెడద పెరిగిపోతోందని, తక్షణమే మున్సిపల్ అధికారులు స్పందించి కుక్కలను తరలించాలని వారు డిమాండ్ చేశారు.

గద్వాల  : శ్రీ భద్రాచల సీతారామస్వామి కళ్యాణ మహోత్సవంలో ఉపయోగించిన పవిత్ర కళ్యాణ తలంబ్రాలను భక్తులకు ఇంటి వద్దకే అందించేందుకు టీ జీ ఎస్ ఆర్ టి సి లాజిస్టిక్స్ ప్రత్యేక సేవలు అందుబాటులోకి తెచ్చినట్లు గద్వాల డిపో మేనేజర్ సునీత, లాజిస్టిక్స్ ఏటిఎమ్  బద్రి నారాయణ తెలిపారు, భక్తులకు సౌకర్యవంతంగా నమ్మకంగా సేవలు అందించడమే టీ జీ ఎస్ ఆర్ టి సి లక్షమని తెలిపారు. భద్రాచలం వెళ్లలేని భక్తులు ఈ అవకాశాన్ని సద్వినియోగం చేసుకోవాలని కోరారు. తలంబ్రాలు బుకింగ్ చేసుకోవాలనుకునే వారు మార్కెటింగ్ ఎగ్జిక్యూటివ్ పృధ్వీ రాజ్(9154298609) కు సంప్రదిస్తే బుకింగ్ చేసి రసీదు ఇస్తారని తెలియజేశారు.

గద్వాల  : జోగులాంబ గద్వాల జిల్లా కలెక్టర్ బి.ఎం. సంతోష్ (ఐఏఎస్2017) బదిలీ అయ్యారు. రాష్ట్ర ప్రభుత్వం చేపట్టిన ఐఏఎస్ అధికారుల బదిలీల్లో భాగంగా ఆయనను గిరిజన సంక్షేమ శాఖ డైరెక్టర్‌గా నియమిస్తూ ఉత్తర్వులు జారీ చేసింది. ఇప్పటివరకు ఈ పదవిలో అదనపు బాధ్యతలు నిర్వహించిన సబ్యసాచి ఘోష్ నుండి ఆయన బాధ్యతలు స్వీకరించనున్నారు. కాగా, సంతోష్ స్థానంలో జోగులాంబ గద్వాల జిల్లా కొత్త కలెక్టర్‌గా ప్రస్తుతం జనగామ జిల్లా కలెక్టర్‌గా పనిచేస్తున్న రిజ్వాన్ భాషా షేక్ (ఐఏఎస్ 2017) నియమితులయ్యారు. ప్రభుత్వ ఆదేశాల మేరకు వీరు తక్షణమే తమ కొత్త బాధ్యతల్లో చేరనున్నారు.

గద్వాల :  హైదరాబాదులో  మినిస్టర్ క్వార్టర్ నందు సోమవారం రాష్ట్ర మంత్రివర్యులు జూపల్లి కృష్ణారావు దంపతులు, పొంగులేటి శ్రీనివాస్ రెడ్డి దంపతులకు గద్వాల ఎమ్మెల్యే దంపతులకు బండ్ల జ్యోతి కృష్ణమోహన్ రెడ్డి మర్యాదపూర్వకంగా కలిసి, మార్చి 14న తేదీన గద్వాలలొ జరగనున్న నా కుమారుడు బండ్ల సాయి సాకేత్ రెడ్డి వివాహ వేడుకకు విచ్చేసి నూతన వధూవరులను ఆశీర్వదించాలని సాదరంగా ఆహ్వానించడం జరిగింది.

అలంపూర్   : జోగులాంబ గద్వాల జిల్లా అయిజ మున్సిపాలిటీలో తెలంగాణ తొలి ముఖ్యమంత్రి కెసిఆర్ పుట్టినరోజు వేడుకలు ఘనంగా నిర్వహించారు.ముందుగా పాత బస్టాండ్ నుంచి తెలంగాణ చౌరస్తా వరకు టిఆర్ఎస్ పార్టీ నాయకుల ఆధ్వర్యంలో ర్యాలీ నిర్వహించారు. ఆ తర్వాత బీఆర్ఎస్ పార్టీ కార్యాలయంలో కేక్ కట్ చేశారు. ప్రభుత్వ ఆసుపత్రిలో రోగులకు పండ్లు పంపిణీ చేశారు.ఈ కార్యక్రమంలో ముఖ్య అతిథిగా అయిజ మున్సిపాలిటీ చైర్మన్ సీఎం సురేష్, వైస్ చైర్మన్ నర్సింహులు, కౌన్సిలర్లు, మాజీ మున్సిపల్ చైర్‌పర్సన్ రాజేశ్వరి, టిఆర్ఎస్ నాయకులు, కార్యకర్తలు,తదితరులు పాల్గొన్నారు.

గద్వాల  : జోగులాంబ గద్వాల జిల్లా అయిజ పట్టణ కేంద్రం బిఆర్ఎస్ పార్టీ కార్యాలయం లో మున్సిపల్ చైర్మన్ సి.యం.సురేష్, వైస్ చైర్మన్ మాల నరసింహులు విజన్ ఆంధ్ర దినపత్రిక నూతన సంవత్సర క్యాలెండర్ ను ఆవిష్కరించారు. ఈ సందర్భంగా వారు మాట్లాడుతూ పత్రిక సమాజంలో ఒక శక్తివంతమైన సమాచార మాధ్యమంగా పనిచేస్తుందని, ప్రజల సమస్యలను, ఆశయాలను, అవసరాలను ప్రభుత్వానికి చేరవేయడంలో పత్రిక కీలక పాత్ర పోషిస్తుందని, అలాగే ప్రభుత్వం తీసుకునే విధానాలు, అభివృద్ధి కార్యక్రమాలు, సంక్షేమ పథకాలను ప్రజలకు అర్థమయ్యే రీతిలో వివరించి తెలియజేయడంలో కూడా పత్రిక వారధిగా నిలుస్తుంది. గ్రామస్థాయి సమస్యల నుండి రాష్ట్ర, జాతీయ స్థాయి అంశాల వరకు ప్రజల గళాన్ని పత్రిక బలంగా వినిపిస్తుంది. నిర్లక్ష్యానికి గురైన సమస్యలను వెలుగులోకి తీసుకువచ్చి, ప్రభుత్వ దృష్టిని ఆకర్షించడంలో పత్రిక ప్రభావవంతమైన పాత్రను నిర్వహిస్తుంది. ఇదే విధంగా ప్రభుత్వం తీసుకున్న నిర్ణయాల వెనుక ఉన్న ఉద్దేశ్యాన్ని, వాటి వల్ల కలిగే లాభాలను ప్రజలకు వివరించడం ద్వారా అపోహలను తొలగిస్తుంది.
ప్రజాస్వామ్య వ్యవస్థలో నాలుగవ స్థంభంగా పత్రిక వ్యవహరించుతూ, ప్రజలు–ప్రభుత్వం మధ్య నమ్మకాన్ని పెంపొందిస్తుంది. నిజాయితీగల వార్తలతో, నిర్మాణాత్మక విమర్శలతో ప్రభుత్వాన్ని జవాబుదారీగా ఉంచుతుంది. అదే సమయంలో ప్రజలను చైతన్యవంతులుగా మార్చి, తమ హక్కులు, బాధ్యతల పట్ల అవగాహన కల్పిస్తుంది.  అందువల్ల పత్రిక కేవలం వార్తలు అందించే సాధనం మాత్రమే కాకుండా, ప్రజల స్వరం ప్రభుత్వానికి చేరవేసే వారధిగా, ప్రభుత్వ ఆలోచనలను ప్రజలకు చేరవేసే దూతగా పనిచేస్తుందని తెలిపారు.    ఈ కార్యక్రమంలో విజన్ ఆంధ్ర స్టాఫ్ రిపోర్టర్ టి.వీరన్న, జర్నలిస్టులు బి.కె. సురేష్, భాస్కర్, మహేంద్ర, బిఆర్ఎస్ పార్టి నాయకులు, కార్యకర్తలు, తదితరులు పాల్గొన్నారు.

గద్వాల  : జోగుళాంబ గద్వాల్ జిల్లా స్థాయి సీఎం కప్– 2025-2026 క్రీడాపోటీలు శనివారం ఇండోర్ స్టేడియంలో ఘనంగా ప్రారంభమయ్యాయి. ఈ కార్యక్రమానికి ముఖ్య అతిథిగా హాజరైన జిల్లా ఎస్పీ  టి. శ్రీనివాసరావు  జిల్లా స్థాయి కబడ్డీ, కోకో, వాలీబాల్ క్రీడాపోటీలను ప్రారంభించారు.
ఈ సందర్భంగా ఎస్పీ  క్రీడాకారులను ఉద్దేశించి మాట్లాడుతూ, 
గ్రామీణ స్థాయి నుంచి ప్రతిభావంతులైన క్రీడాకారులు రాష్ట్ర, జాతీయ, అంతర్జాతీయ స్థాయికి ఎదగాలని ఆకాంక్షించారు. క్రీడలు శారీరక దృఢత్వంతో పాటు మానసిక వికాసాన్ని కూడా పెంపొందిస్తాయని, ప్రతి విద్యార్థి క్రీడలను జీవితంలో భాగంగా చేసుకోవాలని సూచించారు. జిల్లా స్థాయిలో ప్రతిభ చాటి రాష్ట్ర స్థాయిలో జోగుళాంబ గద్వాల్ జిల్లాకు మంచి పేరు తీసుకురావాలని ఆకాంక్షించారు. కార్యక్రమానికి డీవైఎస్ఓ కృష్ణయ్య అధ్యక్షత వహించారు. ఈ సందర్భంగా జిల్లా స్థాయి కబడ్డీ, కోకో, వాలీబాల్ క్రీడాపోటీలు నిర్వహించబడ్డాయి. అనంతరం విజేతలకు ఎస్పీ  మెడల్స్, సర్టిఫికెట్లు అందజేశారు.ఈ కార్యక్రమంలో గద్వాల సర్కిల్ ఇన్స్పెక్టర్ టంగుటూరి శ్రీను, గద్వాల్ పట్టణ ఎస్సై కళ్యాణ్ కుమార్, ట్రాఫిక్ ఆర్.ఎస్సై బాలచంద్రుడు, ఎస్‌జిఎఫ్ సెక్రటరీ డాక్టర్ తోట శ్రీనివాసులు, వ్యాయామ ఉపాధ్యాయులు వి. శ్రీనివాసులు, బషీర్ స్టేడియం ఇంచార్జి, భరత్,పార్వతమ్మ, అనూష, సుహాసిని, బీసన్న, సతీష్, నగేష్ బాబు, అమ్రేష్ బాబు, నరసింహారాజు, ఆనంద్, వెంకట్రాములు, దేవేంద్ర నాయుడు, తదితరులు పాల్గొన్నారు.

గద్వాల   : గ్రామ పంచాయతీ ఎన్నికల్లో గద్వాల నియోజక వర్గ వ్యాపితంగా అధికార కాంగ్రెస్ పార్టీకి బిఆర్ఎస్ గట్టి పోటీ ఇచ్చింది. అదే సీన్ ఇప్పుడు మున్సిపాలిటీ ఎన్నికల్లో రిపీట్ అయ్యిందనే చర్చ మొదలైంది. అస్సలు ఎందుకు కాంగ్రెస్ స్థానాలను కోల్పోతుంది, ఎవరి వల్ల పార్టీకి నష్టం జరుగుతుంది. ఏక పక్ష నిర్ణయాలతోన, లేక కొందరు చెప్పుడు మాటల వల్లనేనా, కొందరు వ్యక్తులు ప్రవర్తిస్తున్న తీరు వల్లన,లేక అధికారంలో ఏ పార్టీ ఉంటే ఆ పార్టీలోకి వలసలు వచ్చి గొప్పలు గప్పలు చెప్పే వారి వల్లన, సరైన విధానం లేకపోవడం వల్లన,  అనేది నేతలు బేరిజ్ వేసుకోవాలి. బిఆర్ఎస్ అధికారంలో ఉన్నప్పుడు 2023 ఎన్నికల్లో కాంగ్రెస్ పార్టీని అధికారంలోకి తేవడానికి రాత్రి పగలు కష్టపడిన కరుడుగట్టిన కాంగ్రెస్ కార్యకర్తలు చెట్టుకోకరు పుట్టకోక్కరయ్యారనే విమర్శలు పెద్ద ఎత్తున వినిపిస్తున్నాయి. వారిని కాదని పార్టీ అధికారంలోకి వచ్చాక పార్టీలోకి వలసలు వచ్చినవారికి ప్రియార్టీ ఇస్తున్నారనే చర్చ జోరుగా కొనసాగుతుంది. మున్సిపాలిటీ ఫలితాల్లో ఇంకో రెండు స్థానాలు బిఆర్ఎస్ పార్టీకి వస్తే ఏంటి పరిస్థితి అనేది కూడా జోరుగా చర్చ కొనసాగుతుంది. బిఆర్ఎస్ ఓడిన కొన్ని స్థానాలు కూడా తక్కువ మెజార్టీతోని అభ్యర్థులు ఓడిపోయారు. ఈ క్రమంలోనే కాంగ్రెస్ పార్టీ స్థానాలపై లెక్కలేసుకునే దుస్థితి వచ్చింది. మున్సిపాలిటీ ఎన్నికల నేపథ్యంలో ఎన్నికల సందర్భంలో ప్రచారానికి ఎంపీ ఎమ్మెల్యే విస్తృతంగా ప్రచారం చేసిన కాని అనుకున్న ఫలితం రాలేదు.మొత్తం 37 వార్డులకు 16 వార్డులు అధికార కాంగ్రెస్ పార్టీకి రాగ, 11 వార్డులు బిఆర్ఎస్ కైవసం చేసుకోగా, రెండు వార్డులో స్వతంత్ర అభ్యర్థులు,  మరో 6వార్డులలో బిజెపి గెలుపొందింది‌. ఇదే క్రమంలో  అధికార కాంగ్రెస్ పార్టీకి బీఆర్ఎస్ గట్టి పోటీ ఇచ్చింది . బిజెపి చాపకింద నీరులా వ్యాపిస్తుందని,ఇదే దూకుడు కొనసాగితే ఎంపిటిసి జడ్పిటిసి ఎన్నికలతో పాటు వచ్చే  అసెంబ్లీ ఎన్నికల నాటికి ఏమిటో పరిస్థితి అనే మరో  చర్చ మొదలైంది. ఎందుకు  కాంగ్రెస్ పార్టీకి ఈ నష్టం జరుగుతుంది,ఎవరివల్ల జరుగుతుంది, అనేది కాంగ్రెస్ అధిష్టానం  నెమరు  వేసుకోకపోతే  రాబోయే రోజుల్లో క్లిష్ట  పరిస్థితితులు ఎదురయ్యే పరిస్థితి ఉంది‌. డబ్బు మద్యం ఏరులై పారిన మున్సిపాలిటీ ఎన్నికల్లో గెలుపే లక్ష్యంగా రాజకీయ పార్టీల నేతలు డబ్బును మద్యాన్ని ఏరులై పారించారు.డబ్బులు ఇచ్చి మద్యాన్ని అందజేసిన కానీ, కొన్ని వార్డులలో ఓటమి ఎదురైంది.నేతలకు ఊహించని  ఫలితాన్ని తీర్పుగా ఇచ్చారు ప్రజలు ..