కేంద్ర ప్ర‌భుత్వ ప‌థ‌కాల‌ను మ‌రింత‌గా ప్ర‌జ‌ల్లోకి తీసుకెళ్లాల్సిన అవ‌స‌రం ఉంద‌ని ప‌త్రికా స‌మాచార కార్యాల‌యం (పీఐబీ) అడిష‌న‌ల్ డైరెక్ట‌ర్ జ‌న‌ర‌ల్ శ్రీమ‌తి శృతి పాటిల్ పేర్కొన్నారు. గ‌త 12 ఏళ్ల‌లో కేంద్ర ప్ర‌భుత్వం సాధించిన విజ‌యాల‌పై గురువారం క‌వాడిగూడ‌లోని సీజీవో ట‌వ‌ర్స్‌లో పీఐబీ 'వార్త' వ‌ర్క్‌షాప్ నిర్వ‌హించింది. ఈ కార్య‌క్ర‌మానికి ఇంట‌ర్ మీడియా ప‌బ్లిసిటీ కోఆర్డినేష‌న్ క‌మిటీ(ఐఎంపీసీసీ)లో భాగంగా ఉన్న వివిధ కేంద్ర ప్రభుత్వ మంత్రిత్వ శాఖలు, విభాగాలు, ప్ర‌భుత్వ రంగ సంస్థ‌లు(పీఎస్‌యూ)ల‌కు చెందిన ఉన్న‌తాధికారులు హాజ‌ర‌య్యారు. తమ శాఖల ప‌రిధిలో అమ‌లు చేస్తున్న సంక్షేమ ప‌థ‌కాలు, అభివృద్ధి కార్యక్ర‌మాల‌ను, గత 12 సంవత్సరాల్లో సాధించిన ముఖ్య విజయాలను వివరించారు. 

ప్రజలకు మరింత సమర్థవంతంగా చేరువయ్యేందుకు భ‌విష్య‌త్తులో చేపట్టాల్సిన ప్రచార కార్యక్రమాలు, మీడియా ద్వారా ప్రభుత్వ కార్యక్రమాలను విస్తృతంగా ప్రజల్లోకి తీసుకెళ్లేందుకు చేపట్టాల్సిన చర్యలపై వారు విస్తృతంగా చర్చించారు. ఈ సంద‌ర్భంగా పీఐబీ విధులు, కేంద్ర ప్ర‌భుత్వ విధానాల‌ను ప్ర‌జ‌ల్లోకి తీసుకెళ్లేందుకు చేప‌డుతున్న కార్య‌క్ర‌మాల గురించి అడిష‌న‌ల్ డైరెక్ట‌ర్ జ‌న‌ర‌ల్ శ్రీమ‌తి శృతి పాటిల్ ప్ర‌జెంటేష‌న్ ఇచ్చారు. కేంద్ర ప్ర‌భుత్వ సంస్థ‌ల‌కు ప్ర‌చార కార్య‌క్ర‌మాలపై స‌హ‌కారం అందించేందుకు పీఐబీ ఎల్ల‌వేళ‌లా సిద్ధంగా ఉంటుంద‌ని ఆమె పేర్కొన్నారు. కేంద్ర ప్ర‌భుత్వ విధానాలు, ప‌థ‌కాల‌ను ఎక్కువ మంది ప్ర‌జ‌ల‌కు చేరువ చేసి, వారు ల‌బ్ధి పొందేలా చూడ‌ట‌మే ల‌క్ష్యంగా ప‌నిచేస్తున్న‌ట్టు చెప్పారు.

ఈ కార్య‌క్ర‌మంలో వివిధ కేంద్ర ప్ర‌భుత్వ సంస్థ‌ల ఉన్న‌తాధికారులు, పీఐబీ, సీబీసీ అధికారులు పాల్గొన్నారు.

న్యూఢిల్లీ: తెలంగాణ రాష్ట్ర అభివృద్ధికి సంబంధించిన పలు కీలక అంశాలపై రాష్ట్ర శక్తి (కార్మిక, ఉపాధి, శిక్షణ & ఫ్యాక్టరీలు) మరియు గనుల శాఖ మంత్రి డా. జి. వివేక్ వెంకటస్వామి, పెద్దపల్లి ఎంపీ గడ్డం వంశీ కృష్ణతో కలిసి సోమవారం న్యూఢిల్లీలో పలువురు కేంద్ర మంత్రులను కలిసి వినతిపత్రాలు సమర్పించారు.

మొదట కేంద్ర కార్మిక, ఉపాధి శాఖ మంత్రి డా. మన్సుఖ్ మాండవీయను కలిసి తెలంగాణలో కార్మిక సంక్షేమ కార్యక్రమాల విస్తరణ, ఉపాధి అవకాశాల పెంపు, కేంద్ర ప్రభుత్వ పథకాల సమర్థవంతమైన అమలుకు మరింత సహకారం అందించాలని కోరారు.

అనంతరం కేంద్ర నైపుణ్యాభివృద్ధి మరియు పారిశ్రామికవేత్తల అభివృద్ధి శాఖ మంత్రి జయంత్ చౌదరితో సమావేశమై యువతకు ఆధునిక నైపుణ్య శిక్షణ, అడ్వాన్స్‌డ్ టెక్నాలజీ సెంటర్ల (ATCs) ఏర్పాటు, పరిశ్రమల అవసరాలకు అనుగుణంగా శిక్షణా కార్యక్రమాల విస్తరణపై చర్చించారు.

తదుపరి కేంద్ర బొగ్గు మరియు గనుల శాఖ మంత్రి జి. కిషన్ రెడ్డిని కలిసి పెద్దపల్లి పార్లమెంట్ నియోజకవర్గానికి కీలకమైన తాడిచెర్ల–II బొగ్గు గని ప్రాజెక్టును త్వరితగతిన పూర్తి చేయాలని విజ్ఞప్తి చేశారు. ఈ ప్రాజెక్టు ద్వారా స్థానిక యువతకు కనీసం 1,000 ఉద్యోగాలు కల్పించాలని, ముఖ్యంగా ప్రాజెక్టు ప్రభావిత గ్రామాల యువతకు ప్రాధాన్యత ఇవ్వాలని కోరారు. అలాగే నిర్వాసిత కుటుంబాలకు పునరావాసం, పునర్నిర్మాణం (R&R) ప్యాకేజీని పూర్తిస్థాయిలో అమలు చేయాలని విజ్ఞప్తి చేశారు.

అదే సందర్భంగా **సింగరేణి కాలరీస్ కంపెనీ లిమిటెడ్ (SCCL)**లో పదవీ విరమణ చేసిన ఉద్యోగులకు నెలకు కనీసం ₹10,000 పెన్షన్ అందేలా కేంద్ర ప్రభుత్వం చర్యలు తీసుకోవాలని కోరారు. ప్రస్తుతం తక్కువ పెన్షన్‌తో ఇబ్బందులు పడుతున్న వేలాది మంది రిటైర్డ్ కార్మికుల పరిస్థితిని కేంద్ర మంత్రుల దృష్టికి తీసుకెళ్లారు.

అదనంగా సింగరేణి సంస్థ విస్తరణ, కొత్త బొగ్గు గనుల అభివృద్ధి, గనుల ప్రభావిత ప్రాంతాల్లో మౌలిక సదుపాయాల మెరుగుదలకు కేంద్ర సహకారం అందించాలని విజ్ఞప్తి చేశారు.

ఈ సందర్భంగా కేంద్ర మంత్రులు తెలంగాణ ప్రభుత్వం సమర్పించిన ప్రతిపాదనలను సానుకూలంగా పరిశీలిస్తామని హామీ ఇచ్చారు. తాడిచెర్ల–II ప్రాజెక్టు త్వరితగతిన అమలు, స్థానిక యువతకు ఉద్యోగాలు, R&R ప్యాకేజీ అమలు, సింగరేణి రిటైర్డ్ ఉద్యోగుల పెన్షన్ పెంపు వంటి అంశాలపై సంబంధిత శాఖలతో చర్చించి తగిన చర్యలు తీసుకుంటామని తెలిపారు.

మంత్రి డా. జి. వివేక్ వెంకటస్వామి మాట్లాడుతూ, తెలంగాణ అభివృద్ధి, యువతకు ఉపాధి అవకాశాల పెంపు, కార్మిక సంక్షేమం, గనుల రంగ అభివృద్ధి కోసం కేంద్ర ప్రభుత్వంతో సమన్వయంతో పనిచేస్తామని, రాష్ట్ర ప్రజల ఆకాంక్షలను నెరవేర్చేందుకు ప్రతి అంశంపై నిరంతరం కృషి చేస్తామని పేర్కొన్నారు.

ప్రశ్నపత్రాలు లీక్‌కు అడ్డుకట్ట వేయడానికి మంత్రివర్గ సమావేశంలో మరిన్ని కఠిన నిర్ణయాలు తీసుకొంటామని ప్రధానమంత్రి శ్రీ నరేంద్ర మోదీ ప్రకటించారు. నిన్న రాత్రి ఒక వీడియో సందేశంలో ఈ మేరకు  ప్రధాని తెలిపారు.
సామాజిక మాధ్యమం ‘ఎక్స్’లో ఒక సందేశాన్ని ప్రధానమంత్రి పొందుపరుస్తూ:
‘‘రేపటి మంత్రివర్గ సమావేశంలో.. ప్రశ్నపత్రాల లీక్ ఘటనలకు వ్యతిరేకంగా మరింత కఠిన చర్యల విషయంలో కీలక నిర్ణయాలు తీసుకుంటాం’’ అని పేర్కొన్నారు.

హైదరాబాద్‌: భారత్-యూకే సమగ్ర ఆర్థిక, వాణిజ్య ఒప్పందం(సీఈటీఏ) అమలులోకి వచ్చిన సందర్భంగా బుధవారం హైదరాబాద్‌లో తెలంగాణ నుంచి యునైటెడ్ కింగ్‌డమ్‌ (యూకే)కు వెళ్లే ఎగుమతి కంటైనర్లను అధికారికంగా ప్రారంభించారు. సనత్‌నగర్‌లోని ఇన్‌ల్యాండ్ కంటైనర్ డిపో(ఐసీడీ) వద్ద ఈ కంటైనర్లను తెలంగాణ ప్రభుత్వ పరిశ్రమలు, వాణిజ్య శాఖ ప్రత్యేక కార్యదర్శి కృష్ణ ఆదిత్య జెండా ఊపి ప్రారంభించారు. ఈ సంద‌ర్భంగా ఆయ‌న మాట్లాడుతూ... భారత్-యూకే ఆర్థిక సంబంధాలలో ఈ ఒప్పందం ఒక ముఖ్యమైన మైలురాయి అని, ఇది భారతీయ ఎగుమతిదారులకు అంతర్జాతీయ మార్కెట్ అవకాశాలను గణనీయంగా మెరుగుపరుస్తుందని పేర్కొన్నారు. పెద్ద సంఖ్యలో ఉత్పత్తులపై పన్నులు తగ్గడం వల్ల తెలంగాణ నుంచి జరిగే ఎగుమతుల పోటీతత్వం పెరుగుతుందని, ఎగుమతి ఆధారిత పరిశ్రమలకు కొత్త అవకాశాలు లభిస్తాయని ఆయన చెప్పారు. విదేశీ వాణిజ్య విభాగం, హైదరాబాద్ అదనపు డైరెక్టర్ జనరల్ డాక్టర్ సంపత్ కుమార్ మాట్లాడుతూ.. భారత్-యూకే సీఈటీఏ ఒప్పందం విస్తృత శ్రేణి ఉత్పత్తులకు ప్రాధాన్యత పన్ను రాయితీలను కల్పిస్తుందని, యూకే మార్కెట్లో భారతీయ వ్యాపారాలకు ఎగుమతి అవకాశాలను గణనీయంగా పెంచుతుందని పేర్కొన్నారు.జాతీయ పసుపు బోర్డు కార్యదర్శి శ్రీమతి భవానీశ్రీ మాట్లాడుతూ... ఈ ఒప్పందం వల్ల లభించే ప్రయోజనాలు చిన్న ప‌రిశ్ర‌మ‌ల‌కు కూడా అందుతాయన్నారు. ఫార్మా, రసాయనాలు, ఎలక్ట్రానిక్స్, ఫుడ్ ప్రాసెసింగ్ రంగాలలో తెలంగాణ ఇప్ప‌టికే బ‌లంగా ఉన్నందున‌, ఈ ఒప్పందం ద్వారా లభించే అవకాశాలను సద్వినియోగం చేసుకొని మ‌రింత ముందంజ‌లో ఉండ‌గ‌ల‌ద‌ని ఆమె ఆశాభావం వ్య‌క్తం చేశారు.అపెడా తెలంగాణ, ఆంధ్రప్రదేశ్ ప్రాంతీయ అధిపతి ఆర్.పి. నాయుడు మాట్లాడుతూ... వ్యవసాయ ఉత్పత్తులు, ప్రాసెస్ చేసిన ఆహారాలు, పాల ఉత్పత్తులు, మిఠాయిలు, చిరుధాన్యాలు సహా అపెడా పరిధిలోని ఉత్పత్తుల ఎగుమతులకు ఈ ఒప్పందం గొప్ప అవకాశాలను అందిస్తుందని చెప్పారు.యూకే హైకమిషన్ ట్రేడ్ అండ్ ఇన్వెస్ట్‌మెంట్ హెడ్ శ్రీ సిద్ధార్థ్ విశ్వనాథన్ మాట్లాడుతూ.. భారత్-యూకే సీఈటీఏను ఒక చరిత్రాత్మక ఒప్పందంగా అభివర్ణించారు. మెరుగైన మార్కెట్ ప్రవేశం, సరళీకృత కస్టమ్స్ విధానాలు, సులువైన డాక్యుమెంటేషన్ ద్వారా ఇది వాణిజ్యాన్ని సులభతరం చేస్తుందని, తద్వారా ద్వైపాక్షిక వాణిజ్యం, పెట్టుబడులను బలోపేతం చేస్తుందని ఆయన పేర్కొన్నారు.

ప్రాధాన్యత మార్కెట్ ప్రవేశం ద్వారా తెలంగాణకు లబ్ధి
భారత్-యూకే సీఈటీఏ ఒప్పందం ప్రాధాన్యత పన్ను రాయితీలు, మెరుగైన మార్కెట్ ప్రవేశం, సరళీకృత కస్టమ్స్ విధానాలు, పటిష్టమైన నియంత్రణ సహకారం ద్వారా తెలంగాణలోని ఎగుమతి ఆధారిత రంగాలకు గణనీయమైన అవకాశాలను కల్పిస్తుందని అంచనా వేస్తున్నారు.తెలంగాణకు ఉన్న ముఖ్యమైన ఎగుమతి గమ్యస్థానాలలో యూకే ఒకటి. 2025-26 ఆర్థిక సంవత్సరంలో తెలంగాణ నుంచి యూకేకు సుమారు 402.5 మిలియన్ అమెరికన్ డాలర్ల విలువైన ఎగుమతులు జరిగాయి. ప్రధాన ఎగుమతి వస్తువులలో ఫార్మాస్యూటికల్స్, బయోలాజికల్స్, ఎలక్ట్రానిక్ పరికరాలు, ఎలక్ట్రికల్ యంత్రాలు, రసాయనాలు, ఇంజనీరింగ్ వస్తువులు, వైద్య పరికరాలు ఉన్నాయి.పలు ఉత్పత్తులపై పన్నులను పూర్తిగా రద్దు చేయడం లేదా గణనీయంగా తగ్గించడం వల్ల యూకే మార్కెట్లో తెలంగాణ ఎగుమతులకు మంచి పోటీతత్వం లభిస్తుంది. ఈ ఒప్పందం ముఖ్యంగా ఫార్మా, లైఫ్ సైన్సెస్, ఎలక్ట్రానిక్స్, ఇంజనీరింగ్, రసాయనాలు, ఫుడ్ ప్రాసెసింగ్, వ్యవసాయం వంటి రంగాలకు ప్రత్యేక ప్రయోజనం చేకూరుస్తుందని భావిస్తున్నారు. ఇది ప్రపంచ సరఫరా గొలుసులో ఎంఎస్ఎంఈల భాగస్వామ్యాన్ని పెంపొందించడానికి, ఎగుమతి ఆధారిత ఉత్పాదక రంగంలో పెట్టుబడులను ఆకర్షించడానికి, ఉపాధి కల్పనను ప్రోత్సహించడానికి దోహదపడుతుంది.

ఈ ఒప్పందం అమలులోకి వచ్చిన సందర్భాన్ని పురస్కరించుకుని నిజామాబాద్‌తో పాటు హైదరాబాద్ హ‌య‌త్‌న‌గ‌ర్ ద‌గ్గ‌ర కూడా ప్రారంభ కార్యక్రమాలను నిర్వహించారు. నిజామాబాద్‌లో కలెక్టర్ శ్రీమతి ఇలా త్రిపాఠి, అపెడా, స్పైసెస్ బోర్డు అధికారుల సమక్షంలో బియ్యం ఎగుమతి కంటైనర్‌ను జెండా ఊపి ప్రారంభించారు. హైదరాబాద్‌లోని హ‌య‌త్‌న‌గ‌ర్ ద‌గ్గ‌ర‌ విదేశీ వాణిజ్య విభాగం జాయింట్ డైరెక్టర్ జనరల్ శ్రీ శంభాజీ చవాన్, అపెడా అధికారులతో కలిసి ఫ్యూమర్ అగ్రి ఫుడ్స్ ప్రైవేట్ లిమిటెడ్ ఎగుమతి చేసిన ఆహార ఉత్పత్తుల కంటైనర్‌ను ప్రారంభించారు.సనత్‌నగర్‌ ఐసీడీ వద్ద జరిగిన ఈ కార్యక్రమంలో హైదరాబాద్ విదేశీ వాణిజ్య అదనపు డైరెక్టర్ జనరల్ డాక్టర్ సంపత్ కుమార్, విశాఖపట్నం సెజ్ డిప్యూటీ కమిషనర్ శ్రీమతి భవానీ శ్రీ, అపెడా ప్రాంతీయ అధిపతి శ్రీ ఆర్.పి. నాయుడు, యూకే హైకమిషన్ ట్రేడ్ అండ్ ఇన్వెస్ట్‌మెంట్ హెడ్ శ్రీ సిద్ధార్థ్ విశ్వనాథన్, సనత్‌నగర్ ఐసీడీ అసిస్టెంట్ కస్టమ్స్ కమిషనర్ శ్రీ ఎమ్.వి.ఎస్.ఎన్. వంశీధర్‌తో పాటు వాణిజ్య శాఖ, కస్టమ్స్, అపెడా, ఎగుమతి ప్రోత్సాహక సంస్థల ఉన్నతాధికారులు పాల్గొన్నారు.